Balkoi modularrak eraikinen bizigarritasuna irauliz

COVID-19aren pandemiak betiko aldatu zuen etxeetako konfortaren pertzepzioa. Kanpoko espazioak izateko beharra lehentasun bihurtu zen pertsona askorentzat 2020ko konfinamenduaren ostean. Horrek bizi-kalitatea hobetzeko irtenbide berritzaileak sortzea bultzatu zuen. Testuinguru horretan sortu zen Balin, Tecnaliak diseinatutako lehen balkoi modular industrializatua, dagoeneko eraikita dauden etxebizitzen azalera bizigarria handitzeaz gain, bizitza iraunkorrago baterako teknologiak integratzen dituena. Talleres Gorlan, Construcciones Zabalandi, Domusa eta Etxesoft euskal enpresen partzuergoarekin batera garatutako proiektua da, eta eraikinetan berehala instalatzen den sistema modular baten bidez erantzuten dio behar horri.

Gaur egun, EAEko bizitegi-parkeak 173.000 etxebizitza baino gehiago ditu balkoirik eta kanpoko espaziorik gabe. Balin bereziki diseinatuta dago mota horretako eraikinetarako, zehazki 1960ko eta 1970eko hamarkadetan eraikitakoetarako, non eraikuntza materialek eta teknikek ez duten erraz uzten egitura tradizionalak integratzen. Ainguratze-sistema diseinatuta dago lehendik dauden egituren osotasuna egokitzeko horiek arriskuan jarri gabe. Gainera, Balinen aldakortasunak aukera ematen du eraikin-tipologia desberdinetan instalatzeko, bai altueran, bai familia bakarreko etxebizitzetan, eta ondorioz, hainbat komunitateren beharretara egokitzeko moduko irtenbidea bilakatu da. Pertsonalizazio estetikoaren gaitasuna ere faktore garrantzitsua da: eraikinaren jatorrizko fatxadarekin bat datozen elementuak eta materialak aukera daitezke, ingurune urbanoaren koherentzia bisuala mantenduz.

EAEko bizitegi-parkeak 173.000 etxebizitza baino gehiago ditu balkoirik eta kanpoko espaziorik gabe

Sistema horrek hainbat abantaila eskaintzen ditu, konponbide tradizionaletatik bereizten dutenak. Instalatzeko azkartasunak ahalbidetzen du obra-denbora nabarmen murriztea, bizilagunei eragozpenak minimizatuta. Gainera, sistema aurrefabrikatua denez, fabrikazio eta muntaketa prozesuak optimizatzen dira, eta horrek kostuak murriztea dakar. Azken produktuaren kalitatea bermatuta dago kontrolatutako inguruneetan fabrikatzeari esker, eta horrek akabera zehatzak eta uniformeak ziurtatzen ditu.

Bestalde, iraunkortasuna ere funtsezko zutabea da Balinen. Fabrikazio-prozesuak hondakin gutxiago sortzen ditu, eta baliabideen erabilera eraginkorragoa egiten du. Horrez gain, segurtasun handiagoa dago obran, lanen iraupen laburragoak eta muntaketaren sinpletasunak lan arriskuak murrizten baitituzte. Gainera, materialen erabilera eraginkorra eta ingurumen-inpaktuaren murrizketa eraikuntza jasangarriaren helburu europarrei laguntzen diete.

Tecnaliaren arabera, Balin ez da balkoi bat, "balkoi aktibo" bat baizik, eta energia berriztagarria sortzeko moduluak txerta ditzake panel fotovoltaikoekin, eraginkortasun handiko aireztapen mekanikoko sistemekin eta kudeatzaile energetiko adimendun batekin. Azken horrek energia kontsumoa optimizatzen du denbora errealeko monitorizazioaren eta iragarpen meteorologikoen bidez, giro osasungarria eta eraginkorra ziurtatuz. Teknologia horiek erabiltzeak, etxeko energia eraginkortasuna hobetzeaz gain, erabiltzaileei beren kontsumoaren gaineko kontrol handiagoa izateko aukera ematen die, epe luzeko kostuak murriztuz. Erosotasun, jasangarritasun eta aurrezpen energetikoaren konbinazio horri esker, Balin apustu segurua da bizitegi-eraikuntzaren etorkizunerako.

Proiektuaren atzean dauden adituak

Balin "berrikuntzarekin konprometitutako" profesional talde baten lanaren emaitza da. Ainhoa Pérez de Arrilucea Cueva arkitekto, ikertzaile eta Tecnaliako proiektuen kudeatzaileak azpimarratu du pandemiak agerian utzi zuela kanpoko espazioen beharra, sistema horren sorrera bultzatuz. "Etxebizitzetan aire zabaleko espazioen eskaria modu esponentzialean hazi da, eta Balinek modu eraginkorrean erantzuten dio errealitate berri horri", adierazi du.

Jorge Torres Barriuso arkitekto tekniko eta Tecnaliako ikertzaileak, berriz, gainditu beharreko erronka teknikoak nabarmendu ditu sistemaren eta eraikin zaharren arteko egiturazko bateragarritasuna bermatzeko. "Egituraren segurtasunaren, estetikaren eta funtzionaltasunaren arteko oreka lortzea izan da proiektuaren erronka handienetariko bat, baina baita gure indargune nagusietako bat ere", nabarmendu du.

Jorge Torres Barriuso (Tecnalia): "Egituraren segurtasunaren, estetikaren eta funtzionaltasunaren arteko oreka lortzea izan da proiektuaren erronka handienetariko bat"

Balin aurrerapauso bat da finkatutako hiri-inguruneetako bizi-kalitatea hobetzeko bidean. Erraz instalatzen denez, abangoardiako teknologiarekin eta jasangarritasun irizpideekin batera, irtenbide berritzailea da egungo etxebizitza parkerako. Erosotasuna eta eraginkortasun energetikoa gero eta gehiago baloratzen dugun mundu honetan, Balin ez da balkoi bat bakarrik, etorkizun iraunkorrago baterantz irekitako ate bat baizik.