Uxue Itoiz: "2025erako helburua izan beharko luke ekintzailetza-tasa handitzen jarraitzea"
Hilabete pasatxo darama Uxue Itoiz Mariñelarenak (Iruñea, 1980) CEIN Nafarroako enpresa eta berrikuntza zentro europarraren zuzendaritzan. Zentroak 2025ean "lanean jarraitzeko" asmoari heldu nahi dio beste behin, "berrikuntzaren bidez trantsizio ekologikoaren eta digitalaren inguruan aukerak sortzeko". Halaber, ekintzailetza-tasari bultzada ematea ezinbestekotzat jo du Itoizek, batez ere ziurgabetasun egoeran, eragina duten egitasmo ekintzaileek "funtsezko zeregina" dutelako.
Zein da zuretzat 2024ko albisterik garrantzitsuena, Nafarroako ekintzailetzarekin eta berrikuntzarekin zerikusia duena?
Gure ekintzailetzaren kalitatea azpimarratuko nuke, azken GEM txostenak islatzen duena, eta azken hiru urteetako joera sendotzen duena. Izan ere, Foru Erkidegoan finkatutako enpresa-jardueraren tasa —hiru urte baino gehiagokoa— % 8,1ekoa da, Europako batez bestekoa (%7,3) baino nabarmen handiagoa.
2025era begira titular edo albiste hori moldatu ahalko bazenu, zein nahiko zenuke titularra edo albistea izatea?
Nire ustez, 2025erako helburua izan beharko luke ekintzailetza-tasa handitzen jarraitzea eta start-up sendotuak hazten jarraitzea. Horrek esan nahiko luke Nafarroak lurralde ekintzailea eta berritzailea izaten jarraitzen duela, kalitatezko enpleguak sortzen dituena, gure bizi-kalitatea are gehiago hobetzen lagunduko digutenak.
"Gure ekintzailetzaren kalitatea azpimarratuko nuke [...]. Foru Erkidegoan finkatutako enpresa-jardueraren tasa —hiru urte baino gehiagokoa— % 8,1ekoa da, Europako batez bestekoa (%7,3) baino nabarmen handiagoa"
Nola ikusten duzue 2025a Nafarroako ekonomiari dagokionez?
2025ean lanean jarraituko dugu, berrikuntzaren bidez trantsizio ekologikoaren eta digitalaren inguruan aukerak sortzeko. Gainera, CEIN bertan izango da, ekin nahi dion edonori laguntzeko, sortu nahi duen enpresa mota eta sektorea edozein direla ere.
CEINen lehentasunetako bat da inpaktu handiko ekintzailetza. Zein neurritan eragin diezaioke egungo ziurgabetasun ekonomikoko egoerak eragin handia duten negozioen garapenari eta mantentzeari?
Erronkak aukera bihurtzea funtsezkoa da, eta are gehiago gure erkidegoko sektore estrategikoei buruz ari garenean. Gure S4 —espezializazio adimenduneko— estrategian zehaztutako sektoreei buruz ari naiz, alegia, automobilgintza, elikadura nekazaritza, energia berdearen industria, medikuntza pertsonalizatua, turismo iraunkorra eta ikus-entzunezkoen industria.
Testuinguru horretan, inpaktuzko prozesu ekintzaileek funtsezko zeregina dute, arazoak eraginkortasunez konpontzen dituzten, balioa sortzen duten, teknologia aprobetxatzen duten eta jasangarriak eta ekonomikoki errentagarriak diren start-upak sortzea dakartelako.