2022an Nafarroan argitaratutako liburuen %9,6 aurkeztu zen euskara hutsean
Argitaratutako 1.322 tituluen gehiengoa (%78,1) gaztelania hutsean kaleratu zen
2022. urtean Nafarroan 1.322 titulu argitaratu zirela jakinarazi du Nastat Nafarroako Estatistika Erakundeak. Gehiengoa, 1.198, liburuak izan ziren, eta gainerako 124ak, liburuxkak. 2021. urtearen aldean produkzioa %8,8 beheratu bazen ere, 2015. urteaz geroztik izandako daturik altuena da 2022koa. Aurreko urtearen aldean gehien bat argitaratutako liburuen produkzioa jaitsi zen, hots, %10,1; liburuxkena %5,1 beheratu zen.
Gehiengoa gaztelaniaz
Argitaratutako tituluak hizkuntzen arabera sailkatuz gero, konturatuko gara euskaraz idatzi diren liburu zein liburuxkak gutxiengoa izan zirela. Izan ere, Nafarroan argitaratutako tituluen %78,1 gaztelania hutsean kaleratu zen; argitalpenen %9,6 izan zen euskara hutsean aurkeztutakoa; gainerako %4,0 gaztelaniaz eta euskaraz kaleratu zen.
Hala ere, datuen arabera 2022an gora egin zuten euskaraz edota euskaraz zein gaztelaniaz idatzitako argitalpenen kopuruek, eta, kontrara, “beherakada txikia” egin zuen gaztelaniaz idatzi zirenen kopuruak.
Argitalpenak gaien arabera bananduz gero, gizarte zientzietakoak gailendu ziren, 661 titulurekin. Bigarren gai nagusia “literatura, historia eta literatura-kritika” izan zen, 211 titulurekin. Hirugarren postua egokitu zaie geografia eta historiari buruzko argitalpenei, 105 izan baitziren.