Aeronautika sektoreak hazten jarraituko duela aurreikusten du Heganek
Klusterrak plan estrategiko berria aurkeztu du gaur. Ingurumen baldintzak betetzen jarraitzea eta digitalizazioa jo ditu gakotzat
Hegan EAEko aeronautika klusterrak datozen lau urteetarako plan estrategikoa aurkeztu du gaur Bilbon egindako agerraldian. Elkarteko bazkideak ia urtebetez izan dira hausnarketa prozesu batean murgilduta eta sektorearen egungo egoeraren analisia egin dute. Heganen arabera, sektoreari ingurumen kaltea murrizteko hobekuntzak eskatzen dizkio gizarteak. Era berean, datozen hogei urteetan flota nabarmen areagotzea aurreikusten du.
Klusterrak uste du hazten jarraituko duela sektoreak, nahiz eta mundua testuinguru ezegonkorrean aurkitu. Sektorearen hornitzaile katea “tentsioak” pairatzen ari da, klusterraren arabera, lehiakortasun handia dagoelako merkatuan. Hala, tresna digitalez probestea gakotzat jotzen du.
Gaurko agerraldian izan dira Ricardo Chocarro Aernnova enpresako zuzendaria, Mikel Jauregi Eusko Jaurlaritzako Industria sailburua eta Ana Villate Heganeko zuzendaria, besteak beste. "Euskal sektore aeroespaziala etorkizuneko industria da, berrikuntzaren, garapen teknologikoaren eta deskarbonizazioaren bultzadan abangoardiaren aldeko apustu nabarmena egiten duena. Azken batean, Euskadiko sektore aeroespazialak Jaurlaritzaren hiru helburu estrategikoak ordezkatzen ditu: industria gehiago, industria hobea eta emisio gutxiago", adierazi du Jauregik.
Halaber, Villatek aeronautika sektorearen hainbat ezagugarri xehatu ditu. Besteak beste, nabarmendu du sektoreak kalifikazio altuko enplegu zuzena sortzen duela, eta “intentsiboa” dela teknologia esparruan. Gainera, balio erantsi altuko produktu eta zerbitzuak sortzen dituen merkatua dela azaldu du.
Ingurumenari dagokionez, klusterreko bazkideek azpimarratu dute sektorea orain hiru hamarkada hasi zela ingurumen eskaerak betetzen, eta “soluzioaren parte” direla diote, “energia garbien sortzaile” direlarik.