EAEko merkataritza sektoreak hazkunde txikia izan du 2024an
Sektoreko salmentak %0,1 hazi ziren iaz, 2023aren aldean. Motordun ibilgailuen salmenta eta konponketaren azpisektorean %8,8 hazi dira salmentak
Eustaten azken datuen arabera, Euskal Autonomia Erkidegoko merkataritza salmentak %0,1 hazi dira 2024an, aurreko urtearen aldean. Handizkako eta txikizkako merkataritza eta motordun ibilgailuen salmenta eta konponketa barne hartzen ditu merkataritza sektoreak, eta urte batetik bestera bilakaera oso antzekoa izan dela ondorioztatu daiteke.
Motordun ibilgailuen salmenta eta konponketan %8,8 hazi dira salmentak, txikizkako merkataritza, aldiz, %2,9. Handizkako merkataritzan izan da beherakada, izan ere, 2024an %2,9 jaitsi dira salmentak, 2023aren aldean.
Lurraldeka, sektoreko salmentak %0,9 handitu dira Gipuzkoan; Araban eta Bizkaian, aldiz, %1,0 eta %0,1 murriztu dira, hurrenez hurren.
2024ko azken hiruhilekoan %1,3 gora
Iazko laugarren hiruhilekoan merkataritza salmentak %1,3 egin zuten gora, 2023ko epe beraren aldean. Motordun ibilgailuen salmenta eta konponketaren sektorean eta txikizkako merkataritzan, %5,1eko eta %4ko hazkundeak izan dira salmentetan, hurrenez hurren. Handizkako merkataritzan, aldiz, salmentak %1,1 murriztu dira aurreko urteko laugarren hiruhilekoaren aldearekin erkatuta.