Etxebizitza alokatzeko eskaria %15 handitu da Araban, Bizkaian eta Gipuzkoan
Etxebizitzaren Euskal Behatokiaren arabera, etxebizitza erosteko eskaerak %6,1 murriztu dira
Araban, Bizkaian eta Gipuzkoan etxebizitza eskariak gorakada handia izan du azken urtean, eta Etxebizitzaren Euskal Behatokiaren azken datuen arabera, eskatzaile gehienek alokairuaren aldeko hautua egiten dute. Etxebizitza alokatzeko eskaera %15,01 igo da Euskal Autonomia Erkidegoan, eta erosteko eskaera, berriz, %6,10 jaitsi.
Eusko Jaurlaritzaren Etxebizitza eta Hiri Agenda Sailak kudeatzen du behatokia. Miguel de los Toyos Etxebizitzako sailburuordearen esanetan, "Etxebiden erregistratutako eskatzaileen guztizko kopurua %10 igo da 2023rekin alderatuta”, eta alokairuaren aldeko joera erreparatuta, “etxebizitzen eskaintza suspertzeko” ahaleginak areagotu behar dituztela adierazi du.
Gasteizen etxebizitza eskaera %25,92 igo da azken urtean. Donostian, aldiz, igoera apalagoa izan da, %2,97koa. Bilbon hazkundea %8,31koa izan da. Beste udalerri handi batzuetan ere hazkundea izan da: Basauri (%7,63), Portugalete (%7,92), Santurtzi (%8,43) edo Errenteria (%9,06).
"Bizitegi-eskariaren bilakaera eta horrek merkatuan duen eragina aztertzen jarraituko dugu, herritarren benetako beharretara egokitutako politika eraginkorrak diseinatzea ahalbidetuko duen informazio zorrotza eskaintzeko helburuarekin", nabarmendu du De los Toyosek.