Gora egin du diru bilketa metatuak Araba eta Bizkaiko ogasunetan

Bizkaiko Foru Aldundiak eta Arabako Foru Aldundiak ekainera bitartean zergetatik jaso dutenaren berri eman dute. Bizkaiko ogasunak urtarriletik ekainera bitarte 4.142,2 milioi euro jaso ditu, 2023ko epe berean baino %1,2 gehiago. Arabako ogasunaren kasuan, diru bilketa metatua 1.000,4 milioi eurora iritsi da ekainean, hau da, aurreko urtean baino %7,7 gehiago bildu da (71,5 milioi).

Bizkaian bilketa gora

Bizkaiko Foru Aldundiak adierazi duenez, zuzeneko zergapetzeak "portaera onari" eutsi dio ekainean, 1.987,4 milioi euro bildu baititu, %7,7ko igoerarekin (141,4 milioi euro gehiago), iazko hil beraren aldean. Zehaztu duenez, nahiz eta 1978 baino lehenagoko mutualitateen kotizazioen gaineko epaiaren ondorioz, itzulketek gora egin, PFEZak %4,3 egin du gora (63,7 milioi gehiago) eta Sozietateen gaineko Zergaren "bilakaera positiboari" eutsi zaio, %49,1eko igoerarekin (112,2 milioi gehiago).

Zeharkako zergapetzeari dagokionez, Ogasunak 1.938 milioi euro bildu ditu, eta, beraz, "jada soilik %4,8koa den jaitsiera moteltzen" jarraitzen du (aurreko hilean baino 5,5 puntu gutxiago eta duela bi hilabete baino 10,7 gutxiago), nahiz eta, aldundiaren arabera, energiaren sektorearen bilketaren bilakaerak "minduta" jarraitzen duen, bai BEZari dagokionez, %11,6 jaitsi baita (maiatzean baino 5 puntu gutxiago), bai Hidrokarburoen Zerga Bereziari dagokionez, %0,2 jaitsi baita.

Gainerako zerga bereziek bilakaera positiboa izan dute. Elektrizitatearen gaineko Zergak ia lau aldiz handitu du 2023ko bilketa; Alkoholen gaineko Zergak, berriz, behera egiten jarraitzen du (%34,6 gutxiago). Halaber, ekitaldi honetan Finantza Transakzioen gaineko Zerga biltzen hasi da, 25,3 milioira iritsiz.

Araban bilakaera positiboa 

Araban, zuzeneko zergek (%5,1eko igoerarekin) eta bereziki zeharkako zergek (%10,6ko igoerarekin) diru-bilketaren bilakaera positiboan lagundu dute, %7,7 igo baita. Horiek horrela, 71,5 milioi euro gehiago biltzea lortu da, 1.000,4 milioi eurora iritsi arte. Horrek jarduera ekonomikoaren portaera ona islatzen du.

Bildutako kopuru metatuak (1.000,4 milioi guztira) % 7,7ko gehikuntza izan du; hau da, aurreko urtean bildutakoa baino 71,5 milioi gehiago da guztira. Zergaz zerga jaso dutenaren berri eman dute. Zuzeneko zergei dagokionez, guztira 453,3 milioi euro jaso dituzte, eta PFEZtik 376,1 milioi, %4,5 gehiago. Lanaren atxikipenengatik eta lanbide jardueragatik bildutako kopurua 483,9 milioi euro izan da, hau da, 32,1 milioi euroko hazkundea aurreko urtearekin alderatuta (%7,1 gehiago). 

Sozietateen gaineko zergatik, 52,7 milioi euro bildu dira, hau da, 2 milioi eurotik gorako igoera izan da aurreko urtearekin alderatuta (%4).  Zeharkako zergen kasuan, 483,6 milioi euro (%10,6). Zerga horien bi kontzeptu nagusien bilakaera desberdina izan bada ere, bilakaera oso positiboa izan da, bildutako zenbatekoa % 10,6 hazi baita.

BEZari dagokionez, bilketa %16,2 handitu da, eta aurten 333,9 milioi euro bildu dira guztira. Hau da, 46,6 milioi euro gehiago iazko epe berean baino. Hidrokarburoen gaineko Zergaren kasuan, 94,4 milioi euro bildu dira, iazko epe berean baino %5,1 gutxiago.