Mexikoko El Marqués udalerriak elkarlanerako akordioa sinatu du Arabako aldundiarekin
Aliantzak helburu du talentua erakartzea, jasangarritasuna sustatzea eta enpresen nazioartekotzea garatzea
Akordioa sinatu dute Arabako Foru Aldundiak eta Mexikoko El Marqués udalerriak, Lankidetza Instituzionaleko Memoranduma ezartzeko. Aliantza lotzeko bildu dira, gaur bertan, Ramiro González Arabako ahaldun nagusia eta Rodrigo Monsalvo El Marqués-eko Udal presidentea.
Akordio berriarekin “lankidetza estrategikoa” lortu nahi dute bi lurraldeen artean, bai garapen ekonomikoan, bai jasangarritasunean, bai talentuaren eraketa zein prestaketan, baita mahastizaintzako eta ardogintzako ondarearen sustapenean. Izan ere, ahaldun nagusiak azaldu du Queretaroko udalerria “leku ezin hobea” dela Arabako enpresak hedatzeko eta beste merkatu batzuetara zabaltzeko.
Ardogintzaren esparrua azpimarratu dute ekitaldian, bi lurraldeetan sektore “oso garrantzitsua” baita. Akordioaren bitartez ardoa eta, oro har, gastronomia “nazioarteko merkatuetan sustatu” nahi da, Araba eta El Marqués “kalitatezko erreferente” bihurtuta. Jasangarritasunaren alorrean ere biek ala biek helburu berak partekatzen dituztela esan dute, eta gaineratu dute lan egingo dutela energia-eraginkortasunaren eta azpiegitura berdeen aldeko apustua egiten duten proiektuetan.
Bestalde, Mondragon Unibertsitatearen laguntzarekin, bi aldeek prestakuntza dualeko programak eta praktikak sustatuko dituzte; “elkarrekin lan egingo” dute talentua sortu eta erakartzeko.