Mungialdea: lurzoruak aukera, ezagutza transferentzia erronka

Mungia, Bakio, Gamiz-Fika, Gatika, Meñaka eta Maruri-Jatabe udalerriek osatzen dute Mungialdea. Bizkaiko eskualdeak aldaketa eta hazkunde prozesuan daramatza hainbat urte. "Eskualdeko garapen ekonomikoa positiboa izan da azken urteotan", plazaratu du Alaitz Erkoreka Mungiako alkateak. Hala diote datuek ere: hamarkada baten %6,3ko hazi da biztanleria, 28.061 biztanletan kokatzeraino, eta pertsonako errenta eskuragarriak eta per capita BPGak ere gora egin dute. 

INSS Gizarte Segurantzako Institutuan jasotzen denez, 1.335 enpresa ditu denera Mungialdeak. 193 industria eta energiari loturikoak dira. "3.141 langile aritzen dira industrian, enpleguaren %29,30 izanik, Bizkaiko batez bestekoa baino 10 puntu gehiago. Horrek lurralde guztian intereseko industria eremu gisa kokatzen du eskualdea", nabarmendu du Bakarne Egia Mungialdeko Behargintza Mungiako udaleko enplegu, ekonomia sustapen eta lurralde garapeneko agentziako presidenteak. Hala ere, eskualdeko jarduera ekonomikoan "hirugarren sektoreranzko" bilakaera nabaritu dute. Zehazki, 1.097 enpresa dira zerbitzuetakoak.

1.335 enpresa ditu denera Mungialdeak. 193 industria eta energiari loturikoak dira. Hala ere, eskualdeko jarduera ekonomikoan "hirugarren sektoreranzko" bilakaera nabaritu dute. Zehazki, 1.097 enpresa dira zerbitzuetakoak

Eskualdean Mungiak du pisu gehien. Ez da soilik biztanleria kontua —18.000 biztanle ditu, eskualdean bizi direnen %64—. Bertan da enpresen %69,51, eta, zehazki, eskualdeko industriaren %83,33. "Langabezia datuak %8,26an daude egun, 759 langabeturekin, Lanbiden erregistratutakoaren arabera. Hau da, 2008 aurretik zeuden langabezia-tasan gabiltza", kontatu du Erkorekak.

Lurzorua abantail

Hazkunde sozioekonomikoa era "planifikatu" eta "antolatuan" gauzatzen ari dira eskualdean, "pixkanaka". Industria elektromekanikoa izan da tradizioz pisu gehien izan duena Mungialdean, baina aukera berriak sortzen ari zatzaizkie. "Mundu mailako elektrifikazioa eta garapen teknologikoak aukera bilakatzen ari dira gure enpresentzat", adierazi du alkateak. 

Potentziala, ordea, harago joan daitekeela uste dute bai Erkorekak, bai Egiak. Mungiako alkateak azaldu duenaren arabera, nekazaritza eta abeltzaintzari loturiko iragana izan du nagusiki eskualdeak, eta hori dela eta ez du izan Bizkaiko beste eremu batzuek izan dituzten industrializazio prozesu berdinak. "Ingurumen kalitateak eta kutsatu gabeko zoruak izateak aukerak eskaintzen ditu", azpimarratu du Erkorekak. Horren bi adibide jarri ditu, biak Belako poligono industrialean kokatutakoak: Arca Catenaria S.A. trenbide-ekipamenduen hornitzailea, eta Idertia Soluciones Industriales S.L, plastikozko produktuen garapenean aritzen dena. "Uste dugu egun, Mungia eta Mungialdea, inbertsiorako eta enpresa garapenerako eremu interesgarriak direla egitasmo pribatuentzat", nabarmendu du alkateak.

Alaitz Erkoreka (Mungiako alkatea): "Uste dugu egun, Mungia eta Mungialdea, inbertsiorako eta enpresa garapenerako eremu interesgarriak direla egitasmo pribatuentzat, kutsatu gabeko lurzoruengatik besteak beste"

Beste abantaila bat dira, Erkorekaren ustez, "inguruan bizi den talentua eta kualifikaturiko esku-lana, profesionalki garatzeko prest dauden pertsonak, izan besteren kontura lanean, izan ekintzailetza proiektuak abiatuta".

Erakundeen eta enpresen arteko komunikazioa erronka

Aurrerapauso horiek emateko gako izan dira Bizkaiko Foru Aldundiak martxan jarritako Bizkaia Orekan Sakonduz estrategiaren testuinguruan landutako zenbait proiektu, tartean Suspertze Digitala eta Enpresa Berdea, hemendik aurrera ere mantenduko dituztenak, enpresei trantsizio digitalerako eta berderako bidean lagundu asmoz. Horretan elkarlanean ari dira Bizkaiko beste agentzia batzuekin, baita Beazekin eta Bizkaiko Foru Aldundiko Ekonomia Sustapeneko departamentuarekin ere.

Marko berean garatutako Match Mungiak jardunaldiek, eragileen arteko konexioa sustatzeko eta informazioa helarazteko sortuak, egitasmo gako izaten jarraituko dute hemendik aurrera ere. Izan ere, kezka nagusietako bat da erakundeen eta enpresen arteko komunikazioa hobetzea, elkarlanetik sortutako egitasmoak bultzatu asmoz. Mungialdeko Behargintzaren plan estrategikoan ezarritako lerroetako bat ere bada, enpresak euren artean konektatzekoarekin batera. "Mungialdeko industria eta horrekin lotura duten zerbitzuen dinamizaziorako tresna nagusia izango da plana", argitu du Egiak. 2025ean onartu eta txertatzen hasiko dira.

Bakarne Egia (Mungialdeko Behargintza): "Poligonoen kudeaketarako planak ere landu nahi ditugu. Badakigu lan konplexua izango dela. Ezinbestekoa izango da poligonoetan dauden enpresen inplikazioa, eta baita administrazioena ere"

Aipatutakoaz gain, beste bi lerro nagusi izango ditu plan estrategikoak. Batetik, eskualdeko poligono industrialen lehiakortasuna eta jasangarritasuna bultzatzeko lehen pausoak ematea, helburu hori epe ertainean bultzatzeko. "Lehen pausoak eman nahi ditugu, epe ertainean, eskualdeko poligono industrialak lehiakorragoak eta jasangarriagoak izan daitezen, eta eremu industrialek izan ditzaten poligonoen kudeaketarako planak. "Poligonoen kudeaketarako planak ere landu nahi ditugu. Badakigu lan konplexua izango dela. Ezinbestekoa izango da poligonoetan dauden enpresen inplikazioa, eta baita administrazioena ere", plazaratu du Behargintzakoak.

Bestetik, ezagutzaren transferentzia landu nahi dute, "Mungialdeko Behargintza enpresetara ateratzea. Kudeaketa bizkorragoa egitea gako da euren beharrei erantzuna emateko", esan du Egiak.

Kanpora begira

Eskualdera begira ez ezik, kanpora begirako programak ere lantzen jarraitu nahi dute Mungiako Behargintzatik, Bizkaia Orekan Sakonduzek eskaintzen duen sarearen baitan. Beste bi proiektutan ari dira horretarako. Lehena, Salbide izenekoa, Espainiako zein bestelako kanpo merkatuetara zabaltzeko salmenta hobetzeko tresna. "Parte hartzen duten enpresei formakuntza eskainiko zaie gaitasun komertzialei dagokienez, eta aipatutako merkatuetara ere sarbidea erraztuko zaie", kontatu du Behargintzakoak.

Bigarrenak, berriz, Elkarrekin Mundura izena du. "Meatzaldeako Behargintzarekin elkarlanean arituko gara, eta horretan elkarlan teknikoak bideratuko ditugu gure enpresek bertan aukerak bilatu ahal ditzaten", gehitu du.