"Zoriontsua zara ala itxurak egiten dituzu?" Zure langileei egiteko 12 galdera

1etik 10era, zein zoriontsua zara lanean? Zoriontsuago izan zaitezkeela uste duzu? Azken egunotan, arbejdsglæde kontzeptua daniarra aireratu da, laneko ongizateari buruzko hainbat txosten eta analisiren protagonista. Gako nagusiak? "Lana dibertigarria eta gogobetegarria izan daiteke modu egokian ulertzen badugu", dio Meik Wiking Kopenhageko Zoriontasunaren Institutuko zuzendari eta Hygge work liburuaren egileak. Asmo handiko helburua du: laneko zoriontasunaren estandarra igotzea.

Munduko biztanleriaren %20 baino ez dago pozik lanean. Bitartean, Danimarkan, hiru pertsonatik ia bik diote gogobetetze handia dutela, Eurostaten datuen arabera. Finlandian edo Alemanian, esaterako, ehuneko hori erdira murrizten da.

Nola neurtzen da laneko zoriontasuna?

Zein da langile baten "laneko zoriontasuna" neurtzeko formula perfektua? "Modu bakarra dago: langileei zoriontsu diren ala ez galdetzea, eta horretaz nola hitz egin daitekeen galdetzea", adierazi du Aitor Tenak, Volkswagen Financial Services taldeko giza baliabideen eta antolakuntzaren zuzendariak. Hau da, galdera zuzen baten bidez, inkesten bidez, edo baita borondatezko bajen kopuruarekin, langileen txandakatzearekin, goragokoekiko harremanarekin edo enpresako feedback kulturarekin lotutako metrika batzuen bidez ere. Hori bai, giza baliabideen guru askorentzat urteko gogobetetze-inkestak "zaharkituta" geratu diren arren, Tenarentzat beharrezkoa da erantzunen "anonimotasuna" bermatzea eta erantzun erabilgarriak lortzeko "segurtasun psikologikoa" ematea.

Tena (Volkswagen): "Ezin dugu zoriontsu izateko erantzukizuna norberarengan baino beste norbaitengan bizkarreratu"

Jakina, langile bat zoriontsu egiten duena desberdina izango da pertsona bakoitzarentzat. "Uste dut ezin dugula zoriontsu izatearen erantzukizuna norbera baino beste norbaitengan jarri", dio Tenak. Laneko ongizateari laguntzen dioten funtsezko bost alderdi nabarmentzen ditu: helburua eta balioak, lan baldintzak, giza harremanak, kontziliazio pertsonala eta, batez ere, hazteko aukerak.

12 galdera "hutsezinak"

Hygge Work liburuan, Meik Wikingek test txiki bat jasotzen du, benetan zoriontasuna ematen digun lan ingurune batean gauden jakiten lagun dezakeena. Gallup aholkularitza enpresaren zerrenda bat da, langileen ongizaterako 12 behar garrantzitsuenak biltzen dituena, eta autohausnarketatik abiatuta egitea gomendatzen du. Erantzun gehienak baiezkoak badira, "leku idealean zaude" esan nahi du.

Testa: zein dira langileen ongizaterako 12 behar garrantzitsuenak?

1. Badakit zer espero den nigandik lanean.
2. Nire lana ondo egiteko beharrezko materiala eta ekipoa ditut.
3. Egunero, hobekien egiten dakidana egiteko aukera dut.
4. Azken zazpi egunetan, nire lan ona aitortu didate.
5. Badirudi nire nagusia nitaz kezkatzen dela pertsona gisa.
6. Nire lanean nire aurrerapenaren babesten duen norbait dago.
7. Nire iritziak inporta dutela sentitzen dut.
8. Nire enpresaren misioak edo xedeak nire lana esanguratsu egiten du.
9. Sumatzen dut nire lankideak kalitatezko lana egiten ahalegintzen direla.
10. Lagun on bat dut lanean.
11. Azken sei hilabeteetan, norbaitek nire aurrerapena berrikusi du.
12. Azken urtean, lanean ikasteko eta hazteko aukerak izan ditut.

Azkenik, Tenak autohausnarketaren garrantzia azpimarratu du, norbera enpresan nola sentitzen den profesionalki eta pertsonalki berrikusteko. Zuzendu daitekeena identifikatzea eta, batez ere, hobetzea, ahal den guztietan, Danimarkako sekretura hurbiltzeko, lanean zoriontsuagoa izateko. Eta badirudi testari erantzutea lehen urrats handia dela.

Artikulu hau VIA Empresa hedabiderako idatzi da, eta bertatik itzuli eta egokitu da.