Eroskik eta Iberdrolak ibilgailu elektrikoak kargatzeko 200 gune jarriko dituzte

Iberdrolak eta Eroskik lankidetza hitzarmena sinatu dute datozen hiru urteetan ibilgailu elektrikoak kargatzeko mila puntu berri instalatzeko eta ustiatzeko. Horietatik 220 inguru EAEn egongo dira. Eroskik jakinarazi duenez, instalazio berriek %100eko energia berdea izango dute, eta urtean 30.000 tona CO2 aurreztea ahalbidetuko dute. Horrek airearen kalitatean 1,5 milioi zuhaitzek izango luketen eragin positiboa izango du, kooperatibaren arabera.

David Martinez Iberdrolako bezeroen arloko Espainiako zuzendariak azaldu duenez, "akordio honek Iberdrolaren mugikortasun iraunkorreko estrategia indartzen du, eta agerian uzten du deskarbonizaziorako eta gure hiri eta udalerrietako airearen kalitatea hobetzeko bidean inplikatutako eragile guztien lankidetzaren beharra".

Bestalde, Eroskiko Garapen zuzendariak, Javier Españak nabarmendu du Iberdrolarekin sinatutako akordio honekin "kalitatezko ibilgailu elektrikoak kargatzeko sare bat" sortzen laguntzen dela, "horrela gure zerbitzuak kontsumitzaileen eskura zabalduz".

Azpiegitura horrekin, erabiltzaileek euren autoen bateria kargatu ahal izango dute erosketak egiten dituzten bitartean, eta 100 kilometro kargatu ahal izango dituzte sei minututik 45 minutura. Lehenengo fasean, lehentasuna emango zaio Eroskiko gasolindegietan birkargatzeko puntuak instalatzeari. Horiek guztiak eskuragarri egongo dira Iberdrolaren aplikazioan. Bertan, kargagailu guztiei buruzko informazio guztia bistaratu eta geolokalizatu daiteke, denbora errealean eraginkorra dela egiaztatuz eta mugikorretik erreserbatu eta ordainduz.