Siemens Gamesak 64 itsas aerosorgailu egingo dizkio Iberdrolari, 1.206 milioi euroren truke
Ingalaterrako East Anglia Two itsas parkerako turbinak egingo ditu Siemens Gamesak. Iberdrolaren ScottishPower filialak esleitu dio kontratua
ScottishPower Iberdrolaren filialak 1.000 milioi librako (1.206 milioi euro) kontratua esleitu dio Siemens Gamesari, East Anglia Two itsas parke eolikorako turbinak ekoizteko. Bi konpainiek ohar bateratu batean jakitera eman dutenez, Siemens Gamesak 64 itsas aerosorgailu egingo ditu.
ScottishPowerrek kudeatutako parke eoliko honek 4.000 milioi librako balioa du (4.824 milioi euro). Suffolkeko (Ingalaterra) kostaldetik ia 33 kilometrora, East Anglia Two parkea filialaren hirugarren itsas proiektu eolikoa da Ipar Itsasoaren hegoaldean, eta 960 megawatt (MW) elektrizitate sortzeko gaitasuna izango du, ia milioi bat etxebizitza hornitzeko adina.
Aerosorgailuaren palek 115 metroko luzera izango dute, eta Siemens Gamesak Hull hirian (Ingalaterra) duen itsas pala eolikoen lantegian fabrikatuko dira. Gaur egun, 1.300 langile inguru dira bertan, azken urtean 600 langile berri baino gehiago kontratatu ondoren.
Kontratu honen esleipena ScottishPowerrek Erresuma Batuan duen inbertsioa bikoiztu egingo duela iragarri ostean iritsi da. 2024 eta 2028 bitartean, 12.000 milioi libratik 24.000 milioira igaroko da euren inbertsioa (14.462 milioi eurotik 28.293 milioi eurora).
East Anglia ScottishPowerren itsas operazio eolikoen zentroa da Erresuma Batuan, East Anglia One martxan dela eta East Anglia Three eraikitzen ari direlarik. Parke eoliko horiek guztiak Siemens Gamesaren turbinaz hornituta egongo dira, eta kalkulatu dute hiru milioi etxe baino gehiago hornitzeko adina elektrizitate sortuko dutela.