Lantegi Batuak-ek espazio berria ireki du Iurretan
97,8 milioi euroko negozio zifra izan zuen iaz irabazi asmorik gabeko erakundeak. Egun, adimen desgaitasuna duten 147 pertsonek egiten duten lan bertan
Anboto izeneko zentroa aurkeztu du Lantegi Batuak-ek. Iurretan (Bizkaia) izango da espazio berria, Bizkaiko irabazi asmorik gabeko erakundearen hogeitabatgarrena, eta 30 pertsona arituko dira bertan lanean, horietatik 25 desgaitasunen bat dutenak.
Azken teknologiako eraldaketa metalikoan eta logistika integralean oinarrituko da zentro berria, eta 5.000 metro karratuko azalera du. Orotara, 1,2 miloi euroko inbertsioa egin da Anboto sortzeko. Power Electronics, Grupo Velatia, Ingeteam Power Technlogy edo Pronutec bezalako enpresentzako teknologia garatuko da zentroaren eremu batean. Beste zati bat, aldiz, logistikarako erabiliko da, Iurretan bertan dagoen Lantegi Batuak-en beste zentro batekin batera. Logistika zerbitzu horiekin, Orbea, Aurubis Berango, KW Damping Technology SA eta Arte Ederren Museoari eskainiko dizkie zerbitzuak erakundeak.
2024ko balantzea
Lantegi Batuak-ek, bere 21 industria zentroetan lorezaintza, garbiketa, dokumentuen kudeaketa edota vending-a bezalako sektoreetan dihardu. 2024an, 49 lan aukera berri sortu zituen desgaitasuna duten pertsonentzat, horietatik 20 bere zentro eta zerbitzu sarean, eta 29 enpresa arruntetan. Gaur egun, adimen desgaitasuna duten 147 pertsona ari dira entitatearen baitan lanean.
97,8 milioi euroko negozio zifra izan zuen iaz, eta hiru milioi euroko inbertsioak egin zituen. Halaber, erakundearen kalkuluen arabera, 262 euroko BSI Balio Sozial Integratua sortu zuen.
2024-2026 aldira begira, lau erronka nagusi zehaztu ditu Lantegi Batuak-ek: “interes taldeei sortutako balio soziala handitzea, pertsonen garapena, hazkundea eta jasangarritasuna, eta garapen teknologikoa”.