Mondragon taldeak 300 milioi euroko fakturazioa izan zuen iaz Nafarroan
Nafarroako Gobernuko delegazio bat izan zen astelehenean Mondragon taldearen Arrasateko egoitza nagusian. 4.500 enplegu sortzen ditu egun korporazioak Foru Erkidegoan
Mondragonek 4.500 pertsona baino gehiago enplegatzen ditu egun Nafarroan, eskualdeko bigarren enplegatzaile handiena delarik. “Lurraldeko enpresa-sarean artikulazio berritzaile eta garrantzitsua duena” da, Mikel Irujo Nafarroako Gobernuko Industria eta Trantsizio Ekologiko eta Digitaleko kontseilariaren esanetan. Mondragon Korporazioak Arrasaten (Gipuzkoa) duen egoitza bisitatu du aste honetan Irujok, eta jakinarazi du korporazioak 300 milioi euro inguruko salmentak sortu zituela iaz foru erkidegoan.
Nafarroako Gobernuaren aldetik, Iñigo Arruti Enpresa Sustapeneko zuzendariak, Uxue Itoiz Energia, Enpresa I+G+b eta Ekintzailetzako zuzendari nagusiak, Adrián Seminario departamentuko kabinete buruak, Iñaki Larraya Sodena sozietate publikoko zuzendariak eta Guillermo Alonso Sodenako Inbertsio zuzendariak hartu dute parte bileran. Kooperatiba taldearen aldetik, Pello Rodríguez presidentea, Juan Mari Palencia CHP Automobilgintza Dibisioko lehendakariordea, Juan Andrés Joaristi Berrikuntza zuzendaria eta Manu Ayerdi foru kontseilari ohia izan dira.
Lankidetza honen izaera estrategikoa azpimarratu du Rodriguezek: “Gertutasunaz ari gara, proiektu berriekiko eta horiek osatzen dituzten pertsonekiko hurbiltasunaz. Harreman iraunkorra da denboran, eta oso anitza sektoreetan, batez ere industrian, energian edo elikagaien nekazaritzan”.
Halaber, Inbiot enpresaren inguruko lankidetzaz hitz egiteko parada ere izan dute bi aldeek. Enpresa hori barruko airearen kalitatea monitorizatzeko eta hobetzeko smart soluzioetan espezializatuta dago, eta Sodena eta Mondragon taldearen arteko lankidetzaren emaitza da.