Satlantisek hirukoiztu egin ditu irabaziak eta %48 handitu du fakturazioa
Aerospazio sektorean dihardu enpresa bizkaitarrak eta 2025erako 48 milioi euro fakturatzea aurreikusten du
Satlantis enpresa teknologikoak 5,3 milioi euroko mozkin garbiak eskuratu zituen iaz. Aurreko urteko emaitzak ia hirukoiztu egin du, eta 26,3 milioi euroko fakturazioa lortu du, 2023an baino %48 gehiago. Halaber, enpresaren EBITDA 8,3 milioi eurokoa izan da, eta kartera zorroak 40 milioi eurotiko gorako balioa du.
Aeroespazio sektorean dihardu Satlantisek eta egun 30 milioi euroko altxortegia du. Hala, 2025erako fakturazioa %82 handitzea aurreikusten du, 48 milioi eurotaraino, eta EBITDA bikoiztea, 15 milioi euroraino.
Enpresa bizkaitarrak sateliteak eta espaziorako kamerak ekoizten ditu eta azaldu duenez, erreferentziazko konpainia bilakatu dira errentagarritasuna eta hazkundeari dagokienez. Juan Tomás Hernani kontseilari delegatuaren hitzetan, "12 urte igaro ondoren, 2013tik, gure proposamen disruptiboa lurraren behaketaren merkatuaren buru dela erakusteko unea zen". Gaineratu du Satlantisek irudi sintetikoak sortzen dituela, optika eta radarren tartean, eta modu horretara, euren sateliteek eskainitako irudien kalitatea hobetzen dutela.
"Zazpi jaurtiketa ondoren, %100eko arrakasta-tasarekin, 17 satelite berri eraikitzen ari gara, Europako hainbat bazkiderekin lankidetzan”, nabarmendu du Hernanik.