Tubos Reunidosek hidrogeno berdea garraiatzeko hodiak egingo dizkio Nortegasi
H2Bidea izena du bi enpresen arteko egitasmoak. Eusko Jaurlaritzaren babesa jaso du, Hazitek programaren bidez
Tubos Reunidos eta Nortegas enpresak elkarlanean aritzeko akordioa itxi dute. Arabako konpainiak hidrogenoa banatzeko hodiak ekoiztuko ditu gas eta argindarraren banatzailearentzat.
H2Bidea izena du bi enpresen arteko elkarlanak, eta helburu du hidrogeno garbiaren banaketa eta garraiorako sarea hedatzea. Eusko Jaurlaritzaren babesa du, Hazitek programaren bidez, eta Europako Batasunaren laguntza ere jaso du. Halaber, ABC Compressors, Orkli, Fidegas eta Calcinor erakundeak ere proiektuaren atzean dira.
Jon Bikandi Tubos Reunidos taldeko I+G arloko zuzendariaren arabera, "erakunde osoa barne hartzen duen etengabeko hobekuntza prozesu batean murgilduta gaude, gure prozesuak eta produktuak jasangarriagoak izan daitezen".
H2Bidea dagoeneko martxan da, eta hiru urteko iraupena izango du.