Mundua alda dezakeen hiruhilekoa

Zeintzuk dira mundu mailan finantza eszenatokia kontrolatzen duten burtsak? New Yorkeko burtsa (NYSE) da mundu mailan kapitalizazio handiena duena: 25 bilioi dolar. Bertan Apple, Microsoft, Amazon edo Coca Cola bezalako erraldoiek kotizatzen dute. Horren alboan Nasdaq-a dago, teknologien merkatua bezala kokatua; 18 bilioiko merkatu kapitalizazioa du eta honetan Teslak, Googlek, Metak edo Netflixek, besteak beste, kotizatzen dute. Asiak sektore honetan geroz eta zeresan handiagoa du. Hurrena, Japoneko Tokioko Burtsa da, Asiako handiena eta mundu mailan hirugarrena, 6 bilioiko kapitalizazioarekin. Bertan Toyota eta Sony bezalako enpresak kotizatzen dute. Nikkei 225 indizea da mundu mailan bere erreferentzia. Txinaren hazkunde ekonomikoaren erakusgarri Shanghaiko burtsa da. 7 bilioitako kapitalizazioa gainditzen du eta sendo hazten doa, baina gobernuak ezarritako erregulazio zorrotz baten menpean. Europan Erresuma Batuko Londreseko burtsa da globalena. 1801ean sortutako burtsa horrek 60 herrialdetako enpresak partaide ditu. Eurogunean, Alemaniako Franfurteko burtsa da garrantzitsuean. DAX40 indizeak Volkswagen, Siemens edo Adidas bezalako enpresak batzen ditu, eta bonuen eta deribatuen komertzioan ezinbesteko garrantzia du. Ez dago berez inportanteagoa den burtsa bakarra; bolumenaren, berrikuntzaren, eraginkortasunaren, nazioarteko irekieraren… eta abarren arabera batak edo besteak izango dute berebiziko garrantzia.

AEBko akzioen bilakaera

Gauzak horrela, baina, AEBeko akzioek azken 23 urteetan izan duen hiruhileko okerrena izan dute (erlatiboki besteekiko). Trumpen aukeraketaren ostean AEBen izan zen merkatu rallya desegin da. S&P500 indizea mundu osoko MSCI indizearekin alderatuz (AEB kenduta) azken 23 urteetan hiruhileko (2025ko urtarriletik martxora) ibilbiderik okerrena izan du. 2002ko bigarren hiruhilekora atzera egin behar da —Worldcom eta Tyco enpresa teknologikoetan gertatutako eskandaluen ondorioz— urte laurden okerragoa topatzeko. Mugimendu bortitza izan da merkatuetan, baina Trumpen aukeraketa egunean merkatuak zeuden puntuaren ozta-ozta azpitik daude. Jaitsiera bortitzak, beraz, suposatu du soilik momentu horretatik izan duten oparotasunean atzera egitea.

Gertatzen ari den hori AEBeko harrokeriaren aurrean atsekabe espasmo bat besterik ez da edo zerbait sakonagoa da?

Mundua interes talde independenteetan ari da kolokatzen berriz ere. Merkantilismo edo autarkia era berri baten aurrean dago

Mundua interes talde independenteetan ari da kolokatzen berriz ere. Merkantilismo edo autarkia era berri baten aurrean dago. Ez dirudi gehiegizko prezioen edo garestiegi zeuden merkatuen aurrean zuzenketa hutsa denik. Trumpen 2.0 aroaren aurretik ere mundua aldatzen zegoen. Munduko Bankuak publikatutako grafiko honetan, non atzerriko inbertsio zuzenak Txinan urtero urtero izan duen bilakaera irudikatzen duen, ikusi daiteke kapitalen jaitsiera dramatikoa.

Estatu mugen artean, kapitalak produktuak baino errazago mugitzen dira alde batetik bestera. Baina aldi berean, apital fluxua errazago geldiarazi daiteke. Mario Draghik publikatu zuen dokumentuan adierazi zuen Europak bere kapital baliabideak atxiki behar zituela lehiakortasuna irabazteko. Erresuma Batuan begiratzen ari dira pentsio funts bakarra sortzea, kapitala etxera ekartzeko, beren barne finantza sistema estatuaren onurarako erabiltzeko eta dirua atlantikoaren bestaldera ez bidaltzek. Japonek bere interes tasak igotzean japoniarren aurrezkiak etxera bidean jarriko ditu. Aldi berean, Europak arma propioak ekoiztearen alde eginiko hautuak suposatuko luke AEBera diru gutxiago bideratzea, egun han erosten baitira. Rusell Napierren (finantza historialaria) iritziz, prozesu honek ibilbide luzea izan dezake; mundu mailako estatu garatuen aurrezki erakundeek euren aktiboak etxera bueltan ekartzea erabakitzen badute, euren gobernuek igorritako bonoak edo zorra erosteko azken urteetan masiboki erositako aktibo bakarra likidatu beharko lukete: S&P 500 indizeko baloreak!

Gaur, apirilaren 2a: Liberation Day

Victor Shvetsen (Macquare etxeko makroestratega) iritziz, estatubatuar askok pentsatzen dute gauzak ezin direla okerrago joan. Eraldaketak egitea baino hobe etxea erretzea dela uste dute, eta Trumpen politikei babes zabala eskaintzen diete. Merkatuetan eta ekonomian errealitatea hautemateko moduak hori bera aldatu dezake; oso kontuan hartu behar dira kontsumitzaileen sentimenduan aldaketa bortitzak. AEBeko kontsumitzaileek inflazioa bueltatuko dela uste dute, eta bonuen merkatuak aurreikusten ari dira bi urte barru inflazioak %3 gaindituko duela. Inflazioaren kontaketa kontroletik kanpo dabil eta betetzen den iragarpena bihurtu daiteke.

Gaur, apirilaren 2an, Liberation Day delakoan, Trump administrazioak iragarri zituen muga zergek AEBeko administrazioak zein puntutaraino heldu nahi duen argitu beharko zukeen. Aldaketa ezean, gaur bertan jakingo da ezarriko dituen muga zergak nazio “laguna” izan direnak aintzat hartuko dituen, balio erantsiaren zergen errepresalia bezala ezarriko dituen edo sektoreka muga zerga gehiago ezarriko dituen. Muga zergak elkarrekikotasuna aplikatuta jarriko balitu, Trumpen aurreko posizioetan atzerapausoa ematea suposatuko luke, malgutasun puntu bat.

AEB eta gaur arte aliatu izan dituen herrien arteko harremanen hausturaren neurria ezagutzen ez den bitartean, ez da posiblea arrisku aktiboentzat (errenta aldakorrarentzat) momentu positiborik izatea

AEBko merkatuetan gertatzen ari den kapitalen ihesaldiak izan dezakeen bilakaera bi faktoreren araberakoa izango da: Trump administrazioak merkataritza politika zein muturrera eraman nahi duen eta barne iritzi politika. AEB eta gaur arte aliatu izan dituen herrien arteko harremanen hausturaren neurria ezagutzen ez den bitartean, ez da posiblea arrisku aktiboentzat (errenta aldakorrarentzat) momentu positiborik izatea.