Banc Sabadell: aukeratzeko eskubidea
Asteburu honetan, Banc Sabadellek Aukeratzeko ahalmena zure indarra da iragarki-sorta argitaratu du orri osora, tiradarik handieneko egunkarietan. Milaka irakurlek ikusiko zuten, eta tartean, bankuko akziodun txiki dezentek. BBVAk jaulkitako EEP edo OPAren aurrean, argi hitz egin nahi izan du, eta lortu du, alajaina.
Lau pieza dira guztira eta ikusi ez badituzu, irakurle, joan eta bilatu. Hona pieza horietako lehena, adibide gisa: "OPA bat adostutzat jotzen da bi aldeak ados daudenean. Bestela, oldarkorra da. Rollo txarrik gabe, baina, argi esango dugu: gure aurkako operazioa OPA oldarkorra da. Kitto".
Duela urte mordoxka bat, bezero bati enpresaren iraupena ziurtatuko zuen fusio-operazio baten komunikazioan lagundu nion. Ertzik gabea zen operazioa, beharrezkoa eta zuzena, baina inguruan inpaktu handia sortuko zuela eta, beldur handia zioten berri emateari. Zorionez, zuzendaria eskarmentu handikoa zen eta dudak uxatu zituen esaldi bakar batez: "Itsasargiak ez du argia ematen ederra izateko, naufragioak saihesteko baizik".
Lehenago edo geroago, beti iristen da momentu bat enpresa baten non zenbakiak ez diren aski. Kontu-egoerak zehatzak eta sendoak izanik ere, ekaitzaren erdian makurtu ohi dira, zifrez haraindi, zentzua aurkitu behar denean.
Isiltasuna ez da neutrala. Batzuetan arnasa hartzea eragozten duen eztarriko korapilo bat da eta beste batzuetan eskuek heltzen saiatzen direnean irrist egiten duen moxala. Sabadellek enpresa-komunikazioan behin eta berriro entzuten ditudan sasiko tranpak saihestu ditu kanpaina honekin. Batetik, ez da ezkutatu isiltasun kalkulatuan, partida jokatzen ari den bitartean kartak gordez. Bestetik, ez da konformatu zarata eragitearekin, hizkera teknikoz betetako txosten mordoiloei izkina eginez. Eta hirugarrenik, argi hitz egiten irten da oraindik zerbait egin daitekeenean, oraindik jokoa irekita dagoenean, beranduegi izan baino lehen.
Zenbat aldiz ez ote dugun esan isiltasuna zurrumurruekin betetzen dela (eta zurrumurruak oso garestiak dira). Kontrakoa pentsa litekeen arren, akziodunek ez dute kontu-balantzearen edo estrategiaren perfekzioa bilatzen, gardentasuna baizik. Krisia, izan ere, zarena erakusteko aukera ere bada.
Sabadellen apustua "zu" pertsonaren aldekoa izan da, finantza munduaren "gu" orokorraren kaltetan. BBVAk "haziko gara" errepikatzen duen bitartean, Sabadellek bezeroari eta akziodunari hitz egin die, bere erabakitzeko ahalmena gogoratuz. Baliteke EEP edo OPA akziodunen batzarretan ebastea (edo auskalo non), baina konfiantzaren aldeko borroka mezu argiekin irabazten da atari zabalean. Hautatu egin behar da, eta argia da oraingo honetan egindako hautua: komunikazio zuzena aukeratzean bere independentzia aldarrikatzeaz gain, jokoan zer dagoen jakiteko akziodunek duten eskubidea ere lehen lerrora ekarri du.
Finantza eta enpresa-fusioen mundua hotza eta arrotza bada ere, bezeroari zuzenean hitz egitea ez da aukera erromantikoa: komunikatzen duten enpresek ez dute krisiari bakarrik aurre egiten, nortasuna indartu egiten dute.
Hautua ez da erraza, baina ur nahasitan nabigatzea ez da sekula erosoa izan, ez da. Komunikatzeko beldur dena liderra izateko prestatuta dago? Lasai, galdera bat besterik ez da.