Eta pixka bat atseginagoa bazina?

Shawn Achorrek, The Happiness Advantage filmean, defendatzen du zoriona arrakasta eragiten duen faktorea dela, haren ondorio izateaz gain. Bere ideia nagusietako bat da adeitasunak, jarrera positiboak eta irribarreak, norberaren ongizatea hobetzeaz harago, eragin biderkatzailea dutela gure ingurunean. Achorrek dio atsegina izateak, umore onean egoteak eta irribarreak konfiantza ere sortzen duela, besteekiko lotura emozionala errazten duela eta lotura sendoak sortzen laguntzen duela. Horrela, komertzial batek bezero potentzial batekiko harremana hasten duenean, hasteko, epe luzerako harremana errazten ari da.

Oso ohituta nago horrelako mezuak helaraztera salmenta-taldetara, baina gaur saltzaileekin edo komertzialekin harremanetan aritu ohi zareten bezeroei zera eskatuko dizuet: adeitasun, irribarre, jarrera positibo eta errespetu dosiak, eta, batzuetan, apaltasun pixka bat.

Bezeroek funtsezko gertaera bat ahaztu ohi dute: denbora, emozioak eta saltzaileen lana eurenak bezain baliotsuak dira

Gogoan dut saltzailea nintzeneko gertaera bat. Bezero potentziala zen erakunde garrantzitsu bateko pertsona zuzendariarekin elkartzeko geratzen nintzenean, sistematikoki hogei edo hogeita hamar minutu izaten nituela itxarongelan, data eta ordua berak markatzen bazituen ere. Beti. Edo ez zen hitzordura agertzen. Hori ere gertatu zen.

Urteek eta zoriak berriro ere topo egitera eraman gaituzte, oraingoan aholkularitzaren arloan baikaude biok. Eta esan nion berarekin asko gogoratzen nintzela, baita bere erakundearekin ere, aipatutako arrazoia zela medio. Arrazoia zuela esan zidan, eta ez zela gai pertsonala; enpresa-kultura zela, hornitzaileek jakin zezaten zein zen euren lekua.

Askotan, bezero batekin biltzen garenean, denbora amaigabean zain izaten gara, edo aurrez abisatu gabe ere ez dira agertzen. Egoera horietan, bezeroek funtsezko gertaera bat ahazten dute: denbora, emozioak eta saltzaileen lana eurenak bezain baliotsuak direla.

Beraz, munduko bezerook, utz iezadazue zenbait eskaera egiten:

• Bisitaria adeitasunez eta errespetuz tratatu: bilera bat egitea onartu baduzue, bete konpromisoa. Itxaronaraztea edo zuzenean ez erantzutea, "goiza zaildu zaizuelako", erabateko begirunerik eza da, eta gutxieneko planifikazio eta interes batekin saihets liteke.
• Arreta jarri: hasiera baten erosteko asmorik ez baduzue ere, entzuteak ikuspegi berriak ekar diezazkizueke beti. Eta zuen premiekin bat ez badator, modu adeitsu eta atseginean esan behar da, gutxiespenik gabe.
• Eskerrak eman bisitagatik: bilera bat ondo prestatzea, enpresari buruz ikertzea eta zuen bulegora joatea denbora eta dedikazioa eskatzen duten urratsak dira. Irribarre atsegina duen "eskerrik asko" soil bat oso baliotsua eta suspergarria izan daiteke pertsona horrentzat.

Eta, eskaerak egiten hasita, norbaitek elkarrizketa hori eskatzeko mezu pertsonalizatua idazten badizue, eta kontu handiz eta modu profesionalean egiten badu, prestatzeko denbora eman ondoren, mesedez, erantzun iezaiozue. "Eskerrik asko, ez zait interesatzen" esateko bada ere. Segundo gutxi dira, eta pertsonaren aldartean eta zuei buruz duen pertzepzioan alde handia markatuko dute.

Irribarre atsegina duen "eskerrik asko" soil bat oso baliotsua eta suspergarria izan daiteke

Merkataritza-harremanak enpresen artekoak dira, baina pertsonok egiten ditugu. Bisitatzen zaituenak eskaintzen dizuena kontratatu beharrik ez dago, baina atseginak izatea zuen esku dago. Batzuetan, zuen hitz pozgarriek edo irribarre zintzo batek pertsona horren aldartea alda dezakete, sarritan huts egin baitu.

Eta dagoeneko egiten duzuen gehiengo handi horri, eskerrik asko zuen denbora eta jarreragatik.