WWDC Applen mundu mailako garatzaileen konferentziaren 2024ko edizioak ezinbesteko mugarri bat ezarri du erraldoiaren bilakaera teknologikoan: Adimen Artifiziala bere sistema eragileen muinean sartu du. Applen AA berriak, Apple Intelligence izenekoak, erabiltzaileek beren gailuekin elkarreragiteko duten modua aldatuko duela agintzen du.
Applek, urtero bezala, bere sistema eragile berriak aurkeztu ditu WWDCn. Berritasun handienetako bat —eta gehien espero zena— AA izan da, edo izendatu duten bezala, Apple Intelligence. AA sagartxoaren ekosisteman sartzeak aplikazioen barruan ekintzak eta zereginak sortzeko gaitasuna ematen du, hizkuntza naturala erabiliz. Horrek izugarri sinplifikatzen du erabiltzailearen esperientzia. AAk aplikazioen datuak aztertzen ditu norberaren gailuan, erabateko pribatutasuna ziurtatuz; izan ere, datu guztiak A17 Pro txipa edo ondorengo bertsioak dituzten gailuetan prozesatzen dira, baita M gamako txip guztietan ere. Kanpoko zerbitzarietan prozesatzea eskatzen duten atazetarako, Applek Private Cloud Compute aurkeztu du, hodeiko datuen pribatutasuna bermatzen duena. Konpainiak ziurtatu du ez dituela erabiliko bere zerbitzarietan gordetako datuak, eta pribatutasun-estandar berri bat ezarri duela AAren industrian.
VisionOS 2
Applek hobekuntza gutxi batzuk aurkeztu ditu visionOSen Apple Vision Pro sistemaren produktibitatean eta erabiltzailearen interakzioan. Ezaugarri nabarmenetako bat da 2D argazkiak 3D irudi bihurtzeko gaitasuna, ikusizko esperientzia hobetuz. Gainera, interfazearekin elkarreragiteko keinu berriak sartu dira, eta Macerako pantaila-modu handiagoa. Azkenik, Applek iragarri duena aintzat hartuz, Vision Pro datorren uztailaren 12tik aurrera erosi ahalko da Ipar Euskal Herrian, 3.999 euroko prezioan.
iOS 18
iOS 18 iPhone gailuen sistema eragile berriak hainbat hobekuntza dakartza, gailuaren pertsonalizazio handiagoa ahalbidetzen dutenak. Erabiltzaileek orain pantailaren edozein lekutan koka ditzakete ikonoak, koloreak alda ditzakete eta ikonoetarako modu iluna aktibatu. Interfazearen aldaketa nabarmenetako bat izan da kontrol-zentroa: botoi pertsonalizagarriekin birdiseinatu dute, blokeo-pantailarako zuzeneko sarbideak gehitzeko aukera emanez. Azkenean, linterna botoi "gogaikarria" ezabatu, eta beste lasterbide batekin ordezkatu ahal izango da.
iMessagen funtzio berrien artean, mezuen programazioa, animazio berriak eta RCS protokoloarekiko bateragarritasuna daude, baita sare satelital bidez mezuak bidaltzeko aukera ere. Posta-aplikazioa ere hobetu egin da, eta mezuak erabiltzailearen lehentasunen arabera antolatzeko aukera emango digu, AAri esker.
Erabiltzaileek orain pantailaren edozein lekutan koka ditzakete ikonoak, koloreak alda ditzakete eta ikonoetarako modu iluna aktibatu
TapCash da beste berrikuntza interesgarri bat, iPhone datafono gisa erabiliz eta transakzioak erraztuz dirua trukatzea ahalbidetzen duena —bizum modukoa—. Ikusteko dago funtzio hori beste herrialde batzuetara iritsiko den edo AEBn bakarrik egongo den eskuragarri. Argazkien aplikazioa birdiseinatu da, eta orain AA erabiltzen du irudiak modu eraginkorragoan eta interfaze intuitiboago batekin antolatzeko.
watchOS 11 eta iPadOS 18
watchOS 11, Apple Watchek daramaten sistemak, funtzio berriak sartzen ditu. Besteak beste, entrenamenduetarako erabilgarri dagoen energia-karga erakusten du, erabiltzaileei eguneroko errutinak eta entrenamenduak egokitzeko aukera emanez. Gainera, jarduera-eraztunen helburuak beharren arabera eta asteko egunaren arabera doitu ahal izango dira.
iPadOS 18k iOS 18ren berrikuntza guztiak ditu. Orain bai, oharrak zuzenean Pencilarekin idazteko gaitasuna duen kalkulagailu bat gehitzen du. AAri esker, sistema gai da eskuz egindako eragiketak ulertzeko eta modu "harrigarrian" ebazteko. Oharrak aplikazioa, bestalde, AAn ere erabili ahalko da, Pencilarekin egiten dugun kaligrafia aldatzeko, irakurgarriagoa izan dadin.
macOS 15 Sequoia
macOS 15 Sequoiak iOSen eta iPadOSen hobekuntzak hartzen ditu, iPhonearen Mirroringa Macen egiteko eta aplikazioak ordenagailutik zuzenean erabiltzeko gaitasuna barne. Sistema eragile berriak erraztu egingo du jakinarazpenak jasotzea eta iPhone eta Macen artean fitxategiak trukatzea. Beste berrikuntza batzuk dira leihoen posizionamendu adimenduna eta bideo-dei batean atzealdea ordezteko aukera.
Applek pasahitzak kudeatzeko aplikazio berri bat ere aurkeztu du, eta bideojoko gehiago iritsiko direla iragarri du
Applek pasahitzak kudeatzeko aplikazio berri bat ere aurkeztu du, eta bideojoko gehiago iritsiko direla iragarri du. Era berean, Ubisoft garatzailearekin akordio batera iritsi ostean, Macentzako bideojokoen esperientzia hobetuko du.
Siri
Urte askoan laguntzaile birtualen atzean egon ondoren, Siri erabat berritu da. Siriren birdiseinuak AAren integrazio sakonagoa barne hartzen du, elkarrekintza naturalagoa eta adimentsuagoa ahalbidetuz. Erabiltzaileek testua eta ahotsa txandakatu ditzakete, eta Sirik orain pantailan erakusten dena uler dezake eta irudi eta fitxategien liburutegian bilaketak egin. Siri berri hau, Applen sistema eragile guztietan izango da, eta gure gailuen sakonean sartzeko gai izango da zereginak arintzeko.
Funtzio interesgarri berri batek, Genmojik, testuinguruan oinarritutako emotikono paregabeak sortzeko aukera ematen du. Sirik Image Playground ere sartzen du, AA bidez irudiak sortzeko aukera ematen duen aplikazio integratua.
Applek aliantza bat iragarri du ChatGPTrekin, Sirin integratuz bilaketa aurreratuagoak eskaintzeko
Applek aliantza bat iragarri du ChatGPTrekin, Sirin integratuz bilaketa aurreratuagoak eskaintzeko eta erabiltzaileen pribatutasuna bermatzeko. Eguneratze hori datozen hilabeteetan egongo da eskuragarri, eta urte amaieran iritsiko da Estatu Batuetara.
WWDC 2024k erakutsi du Apple berrikuntza teknologikoaren buru dela oraindik, adimen artifizialaren ikuspegi sendoarekin. Hainbat urtez teknologia berri honetan atzean geratu ondoren, arreta erabiltzailearen pribatutasunean jarri du, adierazi dutenez. Sistema eragileetako hobekuntzek eta Apple Intelligencen sartzeak gure gailuekin elkarreragiteko modua eraldatuko dutela agindu dute, esperientzia pertsonalizatuagoa eta seguruagoa eskainiz. Berrikuntza horiekin Applek berretsi egiten du teknologia aurreratua eta guztiontzat eskuragarri izateko konpromisoa. Erakutsi du berandu iritsi bada ere, gai dela beti sektore bakoitzeko konpainia berritzaileenetako bat izateko.