Bizkaiko geroz eta enpresa gehiagok erabiltzen dute adimen artifiziala euren egunerokoan. Barrixe Bizkaiko Berrikuntzaren Behatokiak egindako azterlanaren arabera, lurraldeko enpresen %16,6k erabili zuen adimen artifiziala 2024an. Azken urtean nabarmen areagotu da teknologia horren ezarpena enpresetan, izan ere, 2023an, konpainien %8,9k soilik erabiltzen zuen.
Sektore guztietan hazi den arren, zerbitzuen sektorean du presentzia handiena (%21,9), segur aski bezeroaren esperientzia pertsonalizatzeko, zeregin errepikakorrak automatizatzeko eta datu kantitate handiak kudeatzeko duen gaitasunagatik, eta, hala, zerbitzuaren kalitatea hobetzen duelako.
Oro har, digitalizazioan aurrerapauso handiak eman dituzte Bizkaiko enpresek. Zehazki, enpresa guztien %91k egin dituzten aurrerapenak teknologia esparruan. Dena den, digitalizazio maila desberdinak daude. Enpresen %65,3 oinarrizko mailan daude, eta, aldiz, % 25,7k maila aurreratua lortu du lortu du.
Enpresek gehien sartu duten teknologia kudeaketa aurreratuko softwareak dira, CRMak eta ERPak, besteak beste, %69,3tik %78,3ra igo baita 2023tik 2024ra. Zibersegurtasuna (%61,8), Cloud Computing eta birtualizazioa (%42,1) eta merkataritza elektronikoa (%38,9) dira beste teknologia azpimarragarri batzuk.
“Bizkaiko enpresen digitalizazioaren panorama hobetzen” ari dela ondorioztatzen du txostenak, enpresek argi baitute inpaktua handia izango dela, bai euren sektorean, bai enpresan bertan. Hala, inkestan parte hartu duten enpresen %19,5ek adierazi du datozen urteetan adimen artifizialean inbertituko dutela, eta %17,1ek uste du teknologia hori dela bere sektoreko teknologiarik apurtzaileneetakoa.