Pasa den apirilaren 2an, Nintendok ofizialki aurkeztu zuen bere kontsola berria, Nintendo Switch 2, sorpresa ugari eta nobedade teknologikoz beteriko Nintendo Direct zuzeneko batean. Prezioaren inguruko polemikarik ez zen falta izan aurkezpenean. Bigarren belaunaldi honek joko eramangarri eta etxeko esperientzia erabat aldatzea ekarriko du, baina jokalari-komunitatean eztabaida ere piztu du.
Aurkezpena indartsu hasi zen Mario Kart World iragarki izarrarekin. Mario Kart 8 Deluxeren arrakastaren ondoren, izenburu berri honek betiko pista itxiak utzi eta Forza Horizonen antzeko mundu irekia eskaintzen du. Gainera, Nintendok bikoiztu egin du lasterkarien kopurua, 12tik 24ra pasatuz, eta horrek lasterketa kaotikoagoak eta zirraragarriagoak ziurtatzen ditu, online lehiaketetarako aproposak. Mario Kart World-ek ere modu berritzaileak integratuko ditu, hala nola "bizirauteko modua", Fall Guys motako jokoetan inspiratua, non dibertsioa eta kaosa bermatuta dauden. Baina deigarriena iragarritako prezioa izan zen: 89,99 euro bertsio fisikorako eta 79,99 euro digitalerako. Hasierako haserrea leuntzeko, Nintendok kontsolarekin batera pack bat eskaini zuen, jokoaren prezioa 40 eurora jaitsiz.
Berrikuntza nabarmenetako bat GameChat funtzio berria da. 2020ko pandemiak eragindako konfinamenduan garatzaileek izandako esperientzian oinarrituta, funtzio horrek aukera ematen die jokalariei denbora errealean komunikatzeko, beren joko-pantailak partekatzeko eta gainerako jokalarien erreakzioak ikustea ahalbidetuko duen kamera bat USB-C bidez konektatzeko. Ideia Zoom bezalako plataformak erabili ondoren sortu zen, Switch 2 kontsola erabat soziala eta konektatua bihurtuz.
Arlo teknikoan, Switch 2k jauzi nabarmena egin du aurrekoarekin alderatuz. Pantaila 7,9 hazbetekoa da, 1080p eta 120fps-ko bereizmenarekin, modu eramangarrian. Telebistara konektatuta, 60fps-ko 4K bereizmena lortzen du Nvidiaren DLSS teknologiari eta prozesadore berrian integratutako adimen artifizialaren erabilerari esker. Gainera, oinarriak, haizagailu bat du gainberotzea saihesteko. Joy-Con aginteak orain magnetikoki egokitzen dira eta funtzio gehigarriak dituzte, hala nola sagu modua, jolas batzuetan jolasteko aukera emango duena, PC batean egiten dugun bezala. Biltegiratzea 256 GBra arte zabaltzen da, jatorrizko 32 GBko edukiera gaindituz.
Inoiz baino anbizio handiagoko jokoak
Switch 2 jatorrizko Switch jokoekin bateragarria izango da, horietako batzuek eguneratze grafikoak eta errendimendu-eguneratzeak doan jasoko dituzte, eta beste batzuek, Zelda Breath of the Wild edo Tears of the Kingdomek, esaterako, eduki gehigarria izango dute eta ordaindu egin beharko da. Switch 2k belaunaldi berriko izenburuak ekarriko ditu, hala nola Cyberpunk 2077. CD Projekt Red bideojoko estudioak adierazi du Cyberpunk 2077 jokoak zazpi aste baino ez dituela behar izan Switch 2-an izateko, Nvidia-k emandako tresnei esker. Potentzia maila honek PlayStation 4 Pro bezalako sistemekin parekatzen du Nintendoren kontsola berria, eta Xbox Series S-ren lehian kokatzen du.
Potentzia maila honek PlayStation 4 Pro bezalako sistemekin parekatzen du Nintendoren kontsola berria
Nintendo Directean joko esklusibo gehiago ere aurkeztu ziren, hala nola Duskbloods eta Donkey Kong Bananza. Azken hori, Super Mario Odyssey-ren sortzaileek garatua, hogei urte pasatxoren ondoren 3D formatura itzuli da, eta arrakasta handia izango duela aurreikusten da. Jokoa uztailaren 17an jarriko da salgai.
Prezioaren polemika eta etorkizun digitala
Bada, polemikarik handiena prezioaren inguruan sortu zen. Kontsola datorren ekainaren 5ean merkaturatuko da 469 euroren truke. Mario Kart World barne hartzen duen edizioa 509 euroraino igoko da. Jatorrizko Switch-arekiko hazkunde nabarmen horrek Nintendoren estrategiari buruzko kezkak sortu ditu, askoren ustez jokoen bertsio digitalak bultzatzea baitu xede. Mario Kart World berriaren kostu handiak (89 euro fisiko eta 79 euro digital) trantsizio digitala sustatzeko eta pixkanaka formatu fisikotik aldentzeko mugimendu estrategikoa iradokitzen du. Gainera, uste da Nintendo jende helduago, millennial eta teknologikoki zorrotzago batengana bideratzen ari dela, Applek bere produktuetan aplikatu duen premium ereduaren antzekoa.
Uste da Nintendo jende helduago, 'millennial' eta teknologikoki zorrotzago batengana bideratzen ari dela, Applek bere produktuetan aplikatu duen premium ereduaren antzekoa
Nintendo Switch 2 berrikuntza teknologikoz eta anbizioz beteta dator, entretenimendu digitalaren abangoardian kokatzeko. Grafikoetan, errendimenduan eta jolasgarritasunean hobekuntza nabarmenak eginez gero, potentzial nahikoa eskaintzen du prezio altua justifikatzeko. Hala ere, gamer komunitateak erabakiko du Nintendoren hobekuntzek prezioak handitzean eta digitalerako norabidea aldatzean bere gain hartzen duen arriskua konpentsatzen duten ala ez. Merkatuak erabakiko du kontsola arrakasta iraultzaile gisa ala Nintendo bere publiko leialenetik urrundu zuen apustu arriskutsu gisa geratuko den.