Oissy izeneko start-up japoniarrak irabazi du Basque Culinary Centerrek antolatutako Culinary Action! On the Road nazioarteko ekintzailetza programaren hirugarren edizioa. BCCk Eusko Jaurlaritzaren Hazi Fundazioarekin elkarlanean abiarazitako programa da Culinary Action!, eta gastronomia eta elikadura esparruko negozio berriak bultzatzea du helburu.
Adimen artifizialean oinarritutako dastamen-sentsore bat garatu du start-up japoniarrak, Leo izenekoa. Produktuak aztertu eta bost zapore kontuan hartuz (gozoa, gazia, azidoa, mikatza eta “umamia”) zenbateko indarra duten kalkulatzen du.
Ryuichi Suzuki Oissy proiektuko arduraduna “oso harro” azaldu da jasotako aitortzarekin. “Oissyrentzat lehiaketaren hirugarren edizioa irabaztea aukera bikaina da, sektoreko aktore handiekin konektatzeko eta nazioarteko bultzada emateko aukera emango digu”, adierazi du.
Gastronomy Lab startup-inkubagailuan hilabeteko egonaldi bat, Basque Culinary Centerren living lab ireki bat eta BCC Innovation, Basque Culinary Centerren gastronomiako zentro teknologikoan, 20 orduz ikerketa- eta berrikuntza-proiektuak egiteko aukera izango du Oissyk. Era berean, sei hilabeteko egonaldia egin ahal izango du LABe-Digital Gastronomy Lab startup-inkubagailuan.
Atzoko ekitaldian programaren gainerako finalisten proiektuak ezagutzeko parada ere izan zen. Besteak beste, Danimarkako Økoskabet proiektuak elikagai jasangarrien ekoizleak kontsumitzailearekin konektatzeko, produktuak entregatzeko sistema jasangarri bat eskaintzen du, bezeroek, produktuak enkargatu ondoren, posta-bulego itxurako kabina txiki batzuetan jaso ditzaten. Alcheme Biok laborategi batean kultibatutako elikagaiak “nahita goxoak” izateko egiten du lan. Horretarako, elaborazio-prozesuan zaporeak sartzen dizkiete zeluletan.
WNWN Food Lab kakaorik gabeko txokolatea landare-jatorriko osagaietatik abiatuta egiten duen start-upa da, eta Biotango bioteknologiaren, genomikaren, datuen analisiaren eta adimen artifizialaren uztarketaren bidez, laboreen DNA deskodetu eta klima-aldaketen aurrean nola egokituko eta loratuko den aurreikusten duen start-upa da.