Bigarren urtez segidan errekorra hautsita, inoizko bidaia gehien egin zituen Lurraldebusek 2024an. Zehazki, 28,8 milioi bidai egin ziren, 2023an baino %8,71 gehiago.
Azahara Dominguez Gipuzkoako Foru Aldundiko Mugikortasun, Turismo eta Lurralde Antolaketako diputatuak prentsaurrekoa eman du datuaren berri ostegun honetan. Bertan azaldu duenez, hazkundea "zerbitzuaren eskualde guztiek" izan dute, eta "Gipuzkoan garraio publikoaren erabilera sustatzeko egiten ari diren politikei” esker lortu dute inoizko emaitza onena.
Igoera handiena Goierrin eman da (%15,4). Ondoren datoz Buruntzaldea (%12,5), Tolosaldea (%8,4), Oarsoaldea-Bidasoa (% 8,1), Debagoiena (%7,1), Urola Erdia (%6,5) eta Urola Kosta-Debabarrena (%5,3). Bidaia kopuruari dagokionez, Oarsoaldean eta Bidasoan zerbitzua eskaintzen duen Ekialdebus enpresak egin ditu bidaia gehien, 10 milioi baino gehiago.
Halaber, Donostia – Gasteiz autobus lineak ia 500.000 bidaia egin ditu, eta Donostia eta Loiuko aireportuaren artekoak beste 467.125, 2023an baino %33,5 gehiago.
Urola Garaia eta Goierri Donostiarekin lotuko dituen linea berri bat martxan jarriko duela ere iragarri du Lurraldebusek. Dominguezek azaldu du iaz 47 udalerrirekin egin zituztela bilerak lurraldeko mugikortasuna hobetzeko asmoz, eta gaineratu du bere sailak kudeatzen duen 73,4 milioi euroko aurrekontutik 61 milioi Lurraldebusera bideratuko direla.
Euskotrenek ere inoizko daturik onenak
54 milioi bidaia egin ditu Euskotrenek 2024an, urtebete lehenago baino ia %13 gehiago. Susana García Chueca Jaurlaritzako Mugikortasun Jasangarrirako sailburuak iazko ekitaldiko datuak eman ditu gaur Gasteizen.
"Garraio publikoan egindako beherapenek eman digute aukera aprobetxatzen ari dira herritarrak, eta trenez, tranbiaz eta autobusez modu jasangarrian mugitzeko apustu garbia egiten ari dira", adierazi du García Chuecak.
Euskotrenen zerbitzuen erabilerak gora egin du garraio mota guztietan: %10,7 trenbidean, metroan eta funikularrean, %19,37 tranbietan eta %8,71 autobusetan. Sailburuak nabarmendu duenez, zifra horien atzean "guztiontzako jasangarriagoak diren mugikortasun-ohiturak hartzea eta pertsonek CO2 isuriak murriztearen alde egitea dago".