Arabako Foru Aldundiak argitalpen berria egingo du, non Arabako 50 emakume zientzialari eta teknologoren ibilbidea eta hausnarketak jasotzen diren. “Arabako STEAM emakumeen koadernoa” izenpean argitaratuko dute, Deustuko Unibertsitatearekin eta Euskadiko Teknologia Parkearekin elkarlanean.
Bihar egingo da koadernoaren aurkezpena, Zientziaren arloko Emakume eta Neskatoen Nazioarteko Eguna dela eta; argitalpenaren helburua da gazteen artean zientzia eta teknologiarekiko interesa sustatzea, batik bat, nesken artean. Horretarako, “hurbileko erreferenteak nabarmentzen” dira koadernoan, baliagarria izanik ezagutzera emateko “erronka sozialei aurre egiteko egiten duten ekarpen handia”.
Iñaki Gurtubai foru diputatuak nabarmendu du dokumentuak “etorkizuneko belaunaldientzat, eta bereziki neskentzat, inspirazio iturri diren emakumeen istorioak” biltzen dituela. Zientzia eta teknologiaren alorrean gizarte “bidezkoagoa” eta “berdinzaleagoa” bultatzearen garrantzia ere azpimarratu du.
Argitalpenaren egile diren hiru erakundeek Inspira izeneko programan parte hartzen dute, eta proiektu horren barnean biltzen diren ekintzetako bat da argitalpena. Programaren bitartez emakume zein gizon zientzialariak eskoletara joaten dira, ikasleekin STEAM arloez hitz egiteko; jada Arabako 61 ikastetxetako 1.404 mutilek eta 1.367 neskek hartu dute parte proiektuan.