Araba, Bizkaia eta Gipuzkoako foru aldundiek 18.310 milioi euro bildu zituzten iaz zergetan, 2023an baino 97,5 milioi euro gehiago (%0,5 hazkundea). Herri Dirubideen Euskal Kontseiluak aurreikusitakoa baino igoera txikiagoa izan da, eta horren arrazoia Espainiako Auzitegi Gorenak, lan mutualitaten inguruko epaien ondorioz, foru aldundiek PFEZan gauzatutako itzulketen bolumen handia izan dela argitu du kontseiluak. Zehazki, aurreikusitakoa baino 690 milioi euro gutxiago bildu dituzte aldundiek.
Gaur egin du bilera Herri Dirubideen Euskal Kontseiluak eta bertan eman dituzte iazko zerga ekitaldiaren xehetasunak. Zuzeneko zergei dagokienez, PFEZaren diru bilketa %1,6 txikitu da, 2023aren aldean. Sozietateen gaineko Zergaren bilketa, berriz, %6,4 handitu. Zeharkako zergei dagokienez, BEZaren bilketa %0,8 murriztu da.
Lurraldeka, Arabako Foru Aldundiak 2.831 milioi euro bildu ditu zerga itunduetan, 2023an baino %0,4 gutxiago. Bizkaiak 9.409 milioi euro bildu ditu (%0,02 gutxiago) eta Gipuzkoak 6.070 milioi euro (%1,8 gehiago).
Espainiako Estatuari egindako ordainketak ezagutu ondoren, ekarpenen likidazioaren azken zenbatekoa 12.285,7 milioi eurokoa izan dela jakinarazi du kontseiluak. Kopuru hori 2024ko aurrekontuan aurreikusitako emaitza baino 401 milioi euro gutxiago da.