2020. urteaz geroztik iraungita zegoen Bizkaiko Ostalaritzako lan hitzarmena. Gaur, ordea, sindikatuak eta patronala akordioa hitzartzera iritsi dira: ordainsariak %15,5 handitzea adostu dute, martxoaren 1etik aurrera, baita urteko 1.746 lanordu egitea ere. Hitzarmena indarrean egongo da 2027 urtera arte.
CCOO, ELA eta UGT sindikatuak izan dira hitzarmena adostu dutenak; LABek, kontrara, ez du akordioa sinatu. CCOOren ustetan akordioak “hutsuneak” ditu, baina, hala eta guztiz ere, uste du 26.000 langileren lan-baldintzak “hobetuko” dituela. %15,5eko soldata igoeraz gain, datozen bi urteetan soldatak eguneratuko direla jakinarazi dute: 2026 urterako KPI %0,6 soldata eguneraketa, eta 2027 urterako KPI %1,5ekoa.
ELAk adierazi du lan hitzarmen berriak eragotzi egiten duela “lanaldi partzialeko aldizkako langile finkoak ugaritzea”, eta, hortaz, prekaritatea ekiditen duela. Bestalde, riderren, etxez etxeko produktuen bizikletazko banatzaileen, inklusioa azpimarratu du UGTk, “oso sektore prekarioa” baita.