Gipuzkoan desabantaila egoeran dauden gazteen enplegagarritasuna eta inklusioa sustatzeko proiektua jarri dute abian Ikaslan Gipuzkoak, Ikertze kultur elkarteak, Zabalduz kooperatibako Batzen proiektuak eta Sorginlore gizarte elkarteak. Ekinbat! izena du proiektuak, eta EHUko unibertsitatearekin, Zehar-Errefuxiatuekin eta Lanbide Heziketako zein helduentzako hainbat ikastetxerekin elkarlanean gauzatuko da. Halaber, Kutxa Fundazioak finantzatutako du programa.
Sustatzaileek ohar bidez azaldu dutenez, helburu nagusia da Gipuzkoan bizi eta desabantaila egoeran dauden gazteen enplegagarritasuna eta inklusioa erraztea. Horretarako, jendartean, komunitatean eta kulturan parte hartzea sustatzen duten testuinguruak sortuko dituzte, eta eragile estrategikoei bideratutako emantzipaziorako funtsezko ezagutzak zabaltzen dituzten tresnak garatuko dituzte.
Azaldu dutenez, "gazteekin oinarrizko gaitasun soziolaboralak eta errotze soziokulturala garatuko ditugu, baita ekosistemarekiko elkar elikatzea ere". Ikuspegi prebentiboa, sistemikoa eta generokoa duen proposamena da, euskararen sustapena eta jasangarritasuna barne hartuz.
Bestalde, 2025eko abendura bitarte hiru proiektu zehatz garatuko dituzte. Lehenik, gazteekinbat! deiturikoa, non pedagogia feministen bitartez, Gipuzkoako Hasierako Lanbide Heziketako zentro publikoetako gazteen parte-hartze soziopolitikoa sustatuko den. Bigarrenik, emakumeekinbat! izenekoa, emakume gazteak ahalduntzeko eta laneratzeko tresnak garatzeko programa. Eta hirugarrenik, eragileekinbat! izenekoan, desabantaila egoeran dauden gazteak emantzipatzeko ezagutzak sozializatuko dituzte.