Pradalesek ez ezik, Pedro Sánchez Espainiako Gobernuko presidenteak ere agerraldia egin du Moncloan, Donald Trumpek iragarri dituen muga-zergak ezagutu ondoren. Zehazki, Europako produktu orori %20ko muga-zerga ipiniko duela jakinarazi du Trumpek (%25ekoa automobilgintzaren sektorearen kasuan).
Gauzak horrela, “merkataritzari erantzuteko eta bultzada emateko” plan berria aurkeztu du Gobernuak, zeinean 14.100 milioi euro inbertituko diren. Plan horren helburua da AEBk abiarazitako “gerra komertzialaren” aurrean Espainiako Estatuko ekonomia babestea.
Horretarako, Sánchezek azaldu du 7.400 milioi euro finantzaketa berrikoak izango direla, eta gainerako 6.700 milioi euroak, aldiz, jada existitzen diren tresna eta neurrietatik eskuratuko direla. Diruarekin zenbait sektore babestu nahi dira: nekazaritzarena, automobilen industriarena, metalurgiarena, baita albo kalteak pairatuko dituzten bestelako sektoreena ere.
Laguntza guzti hori zenbait azpiataletan banatuko da. Batetik, bi abal lerro aurreikusi ditu presidenteak enpresen finantzaketa errazteko; bestalde industria inbertsio produktiboa sustatzeko funtsa sustatuko da; 200 milioi euro bideratuko dira produkzio planta berriak instalatzeko maileguetara; gainera, Moves izeneko plan berria jarriko da martxan, zeinaren bidez 400 milioi euro bideratuko diren automobilen industria sustatzera.
Merkatu berriak aurkitzeko eta esportazioak sustatzeko laguntzak ere egongo direla azpimarratu du Sánchezek: 2.000 milioi euro kreditu-aseguruetan eta esportaziorako estaldura-kredituetan, 500 milioi ETEen nazioartekotzea sustatzeko laguntzetan; bestelako plana ere iragarri du, azken hori kaltetutako sektoreen presentzia bermatzeko AEBn.
Sánchezek “bidegabekotzat” definitu du gerra komertziala, eta aldi berean Trumpek esandakoak gezurtatu ditu: “Europak ez dizkio AEBei %39ko muga-zergak jartzen, are gehiago, %3 ingurukoak soilik jartzen dizkio”, azaldu du. Gaineratu duenez, Espainiako Gobernua prest dago AEBekin eztabaidatzeko, eta Trumpi “berriz ere hausnarketa egin dezan” eskatu dio.
Azkenik, presidenteak erreferentzia egin die automobilgintzako enpresei, gomendatuz osagaien ekoizpenera bideratzeko negozio-lerroa, Europak datozen urteetan sektore horretan asko inbertituko duela baieztatu baitu.