Donostiako Udalak, Donostia Sustapenaren bitartez, laguntzak emango dizkie gastronomiaren sektoreko proiektu ekintzaile eta berritzaileei. Hala adierazi du gaur Ane Oyarbidek, Ekonomiako eta Tokiko Enplegurako zinegotziak, helburu izanik “sektore estrategikoarekiko” duten “konpromisoa” bultzatzea. Horretarako bi neurri aurkeztu dituzte: 150.000 euroko dirulaguntzak eta aholkularitza zerbitzu berria.
Alde batetik, dirulaguntzei dagokienez, Donostian diharduten enpresei bideratutako deialdi berria ireki da. Aurkeztutako proiektu bakoitzeko 18.000 euroko “oinarrizko laguntza” jasoko da, baita gehigarriak ere. Hots, 1.000 jasoko dira “bazkideren bat lan merkatuan sartzeko zailtasun handienak dituzten kolektiboetakoa bada (emakumeak, 35 urtetik beherakoak edo 45 urtetik gorakoak)”, baita beste 1.000 euro ere “lantokia Donostiako Ekialdeko Barrutian badago”.
Deialdian parte hartzeko epea apirilaren 11ra bitartean egongo da zabalik, baliabideak agortzen ez diren heinean. Laguntza jasotzeko proiektuak 2020ko urtarrilaren 1etik 2025eko martxoaren 31ra bitartean sortuak izan behar dira, eta, betiere, “sektore sozioturistiko eta gastronomikoaren arloko proiektuak” izanik.
Bestalde, Gastro Inkubagailua izeneko aholkularitza zerbitzua inauguratuko da. Programa horrek helburu du proiektu berritzaileei laguntza eskaintzea, besteak beste, langileen prestakuntzarako, talentuaren sustapenerako, bideragarritasuna eta hazkundea sustatzeko, sektoreko eragileekin harremanak sortzeko eta baliabideak eskuratzeko aukerak izateko.