![Argazkia: iStock Argazkia: iStock](https://www.enpresabidea.eus/uploads/s1/26/91/89/83/istock-1155851448.jpeg)
Iazko urtean, 2022an baino diru gehiago xahutu dute EAEko familiek. Eustatek kaleratu duen familia gastuaren inkestaren arabera, etxe bakoitzeko batez besteko gastua 36.331 eurokoa izan da 2023an, 2022aren aldean %4 handiagoa. Dirua non gastatu den ikusita, nabarmentzekoa da aisian eta kulturara bideratutako dirua, izan ere, pertsonako batez besteko gastua %4,5 hazi da, guztira 15.570 euro.
Gastu-taldeen arabera, etxe bakoitzeko batez besteko gastuen bilakaera goranzkoa izan da 12 taldeetatik 8tan. Etxe bakoitzeko batez besteko gastuek aisia eta kulturan izan dute igoerarik handiena 2023an, %21,6ko hazkundearekin 2022ko datuen aldean; horrek esan nahi du etxe bakoitzeko batez besteko gastua 1.745 eurokoa izan dela urtean.
Hazkunderik handiena izan duen etxe bakoitzeko batez besteko gastuaren bigarren talde handiena bestelako ondasunak eta zerbitzuak (%8,4) izan da; ondoren dator jatetxeak eta hotelak (% 6,2) urtean zehar etxe bakoitzean 4.088 euroko batez besteko gastuarekin.
Kontsumoari dagokionez, etxebizitza, ura, elektrizitatea, gasa eta bestelako erregaietan egin dute EAEko etxeetan gasturik handiena, gastuaren herena baino gehiago suposatuz (%35,4), hau da, etxe bakoitzeko 12.849 euro urtean 2023an. Hala eta guztiz ere, nabarmentzekoa da 2023an etxe bakoitzeko batez besteko gastua 8,8 jaitsi dela energia-fakturan. Orotara, EAEko etxebizitzen kontsumoan egindako guztizko gastua 34.272 milioi eurora iritsi da 2023an, hau da, 2022an baino %5 gehiago.
Lurraldeka, Bizkaian egin dira gastu handienak, %51,9. Guztira 36.491 euro gastatu ditu familia bizkaitar bakoitzak. Gipuzkoarrek gastu guztiaren %31,6 ordezkatzen dute, urteko 36.066 euroko batez besteko gastuarekin etxe bakoitzeko. Arabarrek, aldiz, gastuen %15,5 dira, baina gipuzkoarrek baino gehiago gastatu dute, 36.330 euro.
Etxeko diru-sarreren iturri nagusiari dagokionez, iturri nagusia norberaren lanetik eratorritakoa da eta ondoren bigarren etxebizitza batetik jasotako errenta, guztira urtean 45.245 eurorekin.