Martxan da eAtlantic Fundazioa. Iñigo Urkullu lehendakari ohia da fundazioaren buru, eta datozen lau urteetarako patronatuko kide izendatu dituzte Antón Arriola Kutxabankeko presidentea, José Ignacio Galán Iberdrolako presidentea, Carlos Torres BBVAko presidentea eta Emiliano López Achurra Petronorreko presidentea.
eAtlanticen helburu nagusia da Europako Atlantiko aldeko eragile publikoen eta pribatuen arteko dinamikak bultatzea eta elkarlana sustatzea, eta, horretarako, proiektua hasteko fundazioaren zuzkidura 32.000 eurokoa da. Euskal Herriko Agintaritzaren Aldizkarian azaldu denez, fundazioak espazio geografiko zehatz horretako lehiakortasuna indartu nahi du, bai kapital teknologikoari, bai industriari, baita gizarteari dagokionez, “garapen sozialari lagunduko dioten proiektu eta ekimen eraldatzaileak” eginda.
“Herritarrengandik hurbilen dauden maila instituzionalen” parte hartzea sustatu nahi da hala, “funtsezkoa” baita politikak egiterako orduan lurralde bakoitzaren berezitasunak kontuan hartzeko. Hala, estatu kideen autonomia erregionala “errespetatuko” dutela gaineratzen da aldizkarian.