Martxan da jada Emakumeak Zientzian egitasmoaren edizio berria. Atzo egin zuten hasiera ekitaldia, Bilboko Bilborocken, zeina Maitena Salinas aktoreak zuzendu zuen. Azaldu dutenez, 100 pertsona baino gehiago gerturatu ziren ekitaldira. Bihartik aurrera eta otsailaren 14ra bitartean egitarau oparoa antolatu dute interesa duten adin guztietako pertsonentzat, baita eskoletako irakasle zein ikasleentzat ere.
“Hazia erein” lelopean, helburu nagusia da berdintasuna sustatzea, batik bat, zientziaren alorrean, emakumeak ere presente daudela azpimarratuta. Leloaren bitartez gogorarazi nahi da berdintasunerantz aurrerapausoak eman daitezkeela ekintza txikien bitartez. Antolatzaileek hala definitu dute: “Landatutako hazi bakoitza zientzia inklusiboagoa eta ekitatiboagoa lortzeko urratsa da. Elkarrekin aldaketa azkartzen dugu”.