Bihar, martxoak 8, Emakumeen Nazioarteko Eguna denez, Eustat Euskal Estatistika Erakundeak zenbait datu argitaratu ditu, baita emakumeen eta gizonen berdintasunari buruzko datuez osatutako panela ere.
Zifren arabera, emakumeen jarduera-tasa 20 puntu baino gehiago igo da azken berrogei urteetan; okupazio-tasa ere %48,1ekoa da, lehen %22,1ekoa zenean. Horren arabera, bi generoen arteko aldea murriztu da.
Janaria prestatzeari dagokionez, emakumezkoek egoera berean jarraitzen dute, %85,3k parte hartzen baitu jarduera horretan; gizonezkoen tasa, aldiz, nabarmen handitu da:1993. urtean gizonezkoen %33k parte hartzen zuen zeregin horretan, eta 2023an zifra %76,6ra igo zen.
Horrez gain, emakumezkoek 1,04 ordu pasatzen dituzte egunean, batez beste, kozinatzen; gizonezkoek, ordea, eguneko 0,44 ordu. Garbitzen ere denbora bikoitza igarotzen dute emakumeek, eguneko 0,41 ordu (gizonezkoek 0,20).
Paneleko datuek 2022ko zenbait datu ere azaltzen dituzte, non ikusi daitekeen emakumeen batez besteko pertsona-errenta 20.1080 eurokoa zela, gizonezkoen 30.356 euroren aldean. Desberdintasun azpimarragarriena 75-79 urte bitarteko emakumeen eta gizonezkoen batez besteko errenta pertsonalean dago, lehenengoen kasuan 15.800 eurokoa zelako, eta bigarrenen kasuan, bikoitza, 31.816 eurokoa.