Atzo iragarri zituen Gipuzkoako Foru Aldundiak lehen aurreikuspenak 2024ko errenta kanpainari dagokionez: zergadunen alde 75,4 milioi euroko saldo positiboa izango du kanpainak. Gaur, Araba eta Bizkaiaren txanda izan da. Bi lurraldeetan zergadunen aldeko saldo positiboa izango du kanpainak, hau da, diru gehiago itzuliko zaie biztanleei horiek bueltan itzuli beharko dutena baino.
Xehetasunak aztertuta, Arabaren kasuan ia 200 mila zergadunek aurkeztu beharko dute errenta (199.860 pertsonek), iaz baino %1 gehiagok. Orotara 184,7 milioi euro itzuliko ditu Foru Ogasunak, eta aldi berean, 103,8 milioi euro biltzea aurreikusten du. Horren arabera, 80,9 milioi eurokoa da emaitza garbia, zergadunen alde.
Bizkaian ere joera antzekoa izan da, betiere zifrak handiagoak izanik. Aurreikuspenen arabera, 678.000 bizkaitarrek aurkeztuko dute errenta aitorpena, nahiz eta Bizkaiko Foru Ogasunak 781.026 zergaduni helarazi dien aitorpenaren zirriborroa. Guztira Aldundiak 598,1 milioi euro itzuliko ditu, baina beste 421,6 milioi euro jasotzea espero du. Hala, saldo positiboa 176,5 milioi eurokoa izango da, berriro ere, zergadunen alde.
Datu horiek guztiak are xeheagoa aztertuta, Arabako zergadunen %68ri itzuliko zaio dirua, hots, batez beste 1.340 euro; gainerako %32k, batez beste 2.090 euro itzuli beharko ditu. Bizkaian %71,83k jasoko du dirua bueltan: batez beste 1.228 euro; kontrara, batez beste 2.208 euro itzuli beharko du Bizkaiko zergadunen %28,17k.