INE Espainiako Estatistika Erakundeak argitaratu berri dituen datuen arabera, 2024ko laugarren hiruhilekoan gora egin zuten etxebizitza berrien zein bigarren eskuko etxebizitzen prezioek Hego Euskal Herrian.
Zehatz-mehatz, prezioak %12,9 garestitu ziren Nafarroan eta %10,7 EAEn, aurreko urteko epe beraren aldean. Batik bat etxebizitza berrien kasuan izan zen gorakada: %16,7koa Nafarroaren kasuan eta %12,6koa EAErenean. Bigarren eskuko etxebizitzen balioa nabarmen igo bazen ere, zifrak zertxobait baxuagoak izan ziren: %10,9ko igoera izan zen Nafarroan, eta %10,3koa EAEn.
2024ko laugarren hiruhilekoa aurreko hiruhilekoarekin alderatuta, ordea, Nafarroako prezioak %0,1 txikiagoak izan ziren: %1,0ko beherakada etxebizitza berriei dagokienez, eta %0,3ko gorakada bigarren eskukoei dagokienez. EAEn, aldiz, prezioak aurreko hiruhilekoan baino %0,6 garestiagoak izan ziren: etxebizitza berrien balioa %2,1 gutxitu zen arren, %1,2 handitu ziren salneurriak bigarren eskukoen kasuan.