Ane Insaustik Gipuzkoako Foru Aldundiko Ekonomia Sustapeneko eta Proiektu Estrategikoetako foru diputatu izateari utziko dio eta Unai Anduezak hartuko du bere lekukoa. Gipuzkoako Aldundiak jakinarazi duenez, atzerrira joango da Insausti, “bere jatorrizko sektorera” lan egitera.
Eider Mendoza ahaldun nagusiak eskerrak eman dizkio Insaustiri orain arte egindako lanagatik: “bere jakintza eta gaitasun guztiak Gipuzkoaren zerbitzura jarri ditu azken urteotan eta egindako lan emankorra aitortu nahiko nuke”, adierazi du.
Andueza aldundiko Ekonomia Sustapeneko zuzendaria izan da azken bi urteetan eta lehenago Proiektu Estrategikoetako zuzendaria izan zen. Mendozak nabarmendu duenez, Anduezak lurraldeko enpresa sarearekin, garapen agentziekin eta ekonomiaren alorreko eragileekin “elkarlan estuan” dihardu azken urteotan eta, beraz, “ezagutza zabala eta oso gertukoa” du gipuzkoar ekonomiak bizi duen egoeraren inguruan.
“Profil ezin aproposagoa du ahalegin partekatu horretan lekukoa hartzeko, etorkizuneko desafioei elkarlanean ekiten jarraitzeko eta, europar industria bidegurutzean dagoen honetan, gipuzkoar enpresen lehiakortasuna eta berrikuntza hauspotzen segitzeko”, nabarmendu du Mendozak.