Ekinbat! egitasmoa aliantzan dauden lau erakundeek sortutako proiektua da, Ikaslan Gipuzkoak, Ikertze Kultur Elkarteak, Zabalduz Kooperatibako Batzen proiektuak eta Sorginlore Elkarteak. Proiektuak Gipuzkoan gazteen inklusio eta enplegagarritasunaren erronkari erantzuteko asmoa du; alde batetik, gazteen errotze soziokulturala, trebetasun bigunak, ahalduntzea eta komunitatearekin sinergiak lantzean datza, eta, beste aldetik, komunitatean dauden aurreiritzi eta ezagutza faltei aurre egitean oinarritzen da.
Elkarlanean bultzatutako proiektua
Ekinbat! proiektuaren ideia 2023an sortzen da. “Kutxa Fundazioak Desafio Ekosozialetarako Aliantzen dirulaguntza plazaratu zuenean, Sorginlore Elkartekoei deialdia interesgarria iruditu zitzaigun eta gure buruan identifikatutak genituen gabezi batzuei aurre egiteko aukera oso ona izan zitekeela pentsatu genuen”, adierazi du Zaira Garcia proiektuaren koordinatzaileak. Gauzak horrela, lehen ideia horiei forma gehiago emateko helburuarekin estrategikoak izan zitezkeen eragileekin harremanetan jarri ziren, hala nola Ikaslan Gipuzkoa, Ikertze Kultur Elkartea eta Zabalduz Kooperatibako Batzen proiektuarekin. Garciak azaldu duenez, hirurek balizko proposamena zela baloratu ondoren, denen artean beharrak hobeto identifikatzen eta proiektuaren diseinuarekin hasi ziren.
Aipatutako lau erakundeez gain, proiektuan ere elkarlanean aritzen dira EHU, Zehar-Errefuxiatuak elkartea eta Lanbide Heziketako zein hainbat Helduentzako Ikastetxe.
Inbertsio materiala eta giza inbertsioa
Finantzazioari dagokionez, proiektuak bi diru-iturri ditu. Alde batetik, Kutxa Fundazioaren Desafio Ekosozioaletarako Aliantzen deialdia, eta bestetik, Gipuzkoako Foru Aldundiaren Etorkizuna Eraikiz Gipuzkoa Taldean ekimenarena. “Bi finantzazio hauek 2024-2025 urtean proiektua gauzatzeko aukera ematen digu”, dio koordinatzaileak.
Horrelako proiektu batek inbertsio materiala zein giza inbertsio altua eskatzen du. Sorginlore Elkartearen kasuan, lortutako finantzazioaz gain, haien ezagutzak, materialak eta espazioak eskainiko dituzte.
Zaira Garcia: “Jakina da jendarte anitz eta inklusiboak ekonomikoki justuagoak direla, eta aldi berean, lehiakorragoak”
Hala ere, proiektu honen inpaktu eremua mugatuta dago, bai denboran, bai geografikoki. Beraz, horrelako proiektu batek Euskal Autonomia Erkidego mailan denboran zehar irautea nahi izanez gero, inbertsio askoz altuagoa izan beharko luke. Horrez gain, eragile eta administrazioen apustua ere eskatzen du.
“Jakina da jendarte anitz eta inklusiboak ekonomikoki justuagoak direla, eta aldi berean, lehiakorragoak”, nabarmendu du Garciak. Beraz, proiektuak epe luzean ekonomian inpaktu positiboa eta zuzena izatea espero dute. Horrekin batera, epe motzean proiektu horrek desabantaila egoera dauden edo egon daitezkeen horien parte hartzea sustatuko du, eta epe ertainean inklusioa eta enplegagarritasuna ere bultzatuko ditu.
Profil desberdinak
Ekinbat! proiektua lau profil desberdinetara zuzenduta dago. Lehenik eta behin, Hasierako Lanbide Heziketa zentroetako gazte zein irakasleei. Bigarrenik, Lanbide Heziketa zentroen komunitateei edo ekosistemei (hau da, eragile komunitarioak, lokalak edo herrikoak). Hirugarrenik, emakume gazteei; Lanbide Heziketako ziklo maskulinizatuetan, helduentzako heziketa zentroetan eta aldundiaren babes-emantzipazio sisteman daudenak. Eta, azkenik, eragile estrategikoei; hala nola administrazio publikoa, enpresa pribatuak edo eragile antolatuak.
“Esku-hartzeak, nagusiki, profil horietara bideratuko diren arren, programak beste publiko batzuentzat ere pentsatuta egongo dira”, esan du. Besteak beste, hezkuntza ez-formaleko eragileak, erdi eta goi mailako lanbide heziketa zentroak eta hezkuntza formaleko beste zentro batzuk.
Enplegagarritasuna eta inklusioa errazten
Proiektuaren helburu nagusia Gipuzkoan bizi diren eta desabantaila egoeran dauden gazteen enplegagarritasuna eta inklusioa erraztea da; modu horretan, desberdintasunak murrizten lagunduko litzateke. Horretarako, Garciaren arabera, gizartearen eta kulturaren parte hartzea osoa sustatuko duten testuinguruak sortuko dituzte, bai eta eragile estrategikoetan funtsezko ezagutzak erraztuko dituztenak ere.
Aurrerago azalduko diren hiru ekimenek bizitza propioa izateaz gain, beren artean elkar elikatzen dira. “Gazteek ez dute izena eman behar, erakunde antolatzaileek zentroen hautaketa egin genuen, eta Ikaslan Gipuzkoak zubi lanak egin ondoren, egitasmoa interesgarria iruditu zitzaien zentroekin aurrera egingo dugu”, azaldu du koordinatzaileak. Beraz, zentro edo babes-emantzipazio sistema horietan dauden gazteek parte hartzeko aukera izango dute.
“Gazteek ez dute izena eman behar, erakunde antolatzaileek zentroen hautaketa egin genuen, eta Ikaslan Gipuzkoak zubi lanak egin ondoren, egitasmoa interesgarria iruditu zitzaien zentroekin aurrera egingo dugu”
Bestalde, enpresa, eragile estrategiko edo administrazio publikoen kasuetan, batzuetan haiek gerturatuko direla, eta beste batzuetan alderantziz izango dela adierazi du; izan ere, azken hauetan haiek egingo dituzte deialdi irekien bitartez gerturatuko ahalko dira.
Hiru ekimen
Ekinbat! erronka 2024-2025 ikasturtean zehar garatuko da. Halaber, egitasmoaren proiektu sortan hiru programa barnebiltzen dira, bi urte hauetan garatzea aurreikusten direnak.
Alde batetik, Gazteekinbat! pedagogia feministen bitartez, Gipuzkoako Hasierako Lanbide Heziketa zentro publikoetako gazteen parte-hartze soziopolitikoa sustatzeaz gain, sinergiak sortuko dituzte tokiko ekosistemen eta zentroen artean. Irakasleak eta ikasleak prestatuko dituzte parte-hartze komunitarioan eta gaitasun soziokulturaletan, diagnostiko komunitario bat eta komunitateko eragileekin batera ekintza bateratu bat martxan jartzeko xedez. Ekimen horretan ehun gaztek parte hartzea espero dute.
Gazteekinbat! pedagogia feministen bitartez, Gipuzkoako Hasierako Lanbide Heziketa zentro publikoetako gazteen parte-hartze soziopolitikoa sustatzeaz gain, sinergiak sortuko dituzte tokiko ekosistemen eta zentroen artean
Bestalde, Emakumeekinbat! teknika artistikoetan oinarritutako introspekzio sortzaile prozesu baten bitartez, emakume gazteak ahalduntzeko eta laneratzeko tresnak garatuko dituzte. Emakume taldeak anitzak izango dira; hau da, babes emantzipazio sistemetara lotutakoak, Helduentzako Hezkuntza Ikastetxeko ikasleak edota Erdi Mailako Lanbide Heziketako ziklo maskulinizatutakoak. Kasu honetan, 30 emakume gaztek parte hartzea espero da.
Azkenik, Eragileekinbat! egitasmoaren bitartez, desabantaila egoeran dauden gazteak emantzipatzeko ezagutzak sozializatuko dituzte. Horretarako, enpleguaren bidez helduarora igarotzeko baliabideen gida eleanitza egingo dute. Lanbide Heziketa zentroek, enpresek, administrazio publikoek, gizarte entitateek eta proiektu sortako gazteek gidaren sorreran eta gizarteratzean parte hartuko dute.
2024-2025 ikasturteari begira
Parte-hartzeak gazte eta komunitateko eragileen artean harremanak sortzeko aukera ematen du, inklusiorako aukerak handituz. Harremanak eta gertutasunak aurreiritzien desmuntaia dakar, bi aldeetatik. Era berean, enplegagarritasuna sustatuko da, eta gazteek parte-hartze komunitario eta kulturalera gerturatzeko aukera izango dute. Beraz, komunitatean aurreiritziak lantzea eta profil desberdinetako pertsonen enplegua sustatzeko ezagutzak aregoatzea aurreikusten dute.
Dagoeneko Ekinbat! martxan dago, baina esku-hartze zuzenak 2024-2025 ikasturtean burutuko dira, hau da, 2024ko lehenengo seihilekoa diseinua fintzen, publikazioen sorkuntzan eta hainbat ekintzen prestaketan eman dituzte. Irailetik aurrera gazte, irakasle eta komunitateekin hasiko dira zuzeneko lanean. Eta, azkenik, 2025ko ekainetik aurrera "sistematizazioak eta sozializazioak" egingo dituzte.