EAEko langile guztientzako 1.500 euro gordineko gutxieneko soldata propioa proposatuko dute sindikatuek (ELA, LAB, Steilas, Esk, Hiru eta Etxalde) martxoaren 20an egingo duten Lan Hitzarmen Kontseiluan. Helburu hori lortzeko bi urteko epea aurreikusten dute sindikatuek, eta patronalari eskainiko diote Materia Zehatzeko Akordio baten bitartez ezartzea.
Aldi berean, Confebaski bere jarrera “zuzentzeko eta birplanteatzeko” eta hitzarmena negoziatzeko eskatu diote, haien ustetan, proposamena “egingarria, arrazoizkoa eta onargarria” delako. Confebaskek negoziatzeari uko egin zion otsailean, neurriak lehiakortasunean eragina izan dezakeela esanda. Eusko Jaurlaritzarekin, hots, Imanol Pradales lehendakariarekin zein Mikel Torres lehendakariorde eta Ekonomia, Lana eta Enplegu sailburuarekin, bilerak egin ezin izana salatu dute, eta gaineratu dute “haien erantzunaren zain” jarraitzen dutela.
Hiru lurraldeetako patronalen erantzunik jaso ez dutela ere azaldu dute (sindikatuek banakako bilerak eskatu zizkieten). Hala, Confebask, Adegi, Cebek eta SEAk elkarrizketa “baztertzen” ari direla esan dute.
Gogorarazi dute beharrezkoa ikusten dutela EAEk gutxieneko soldata propioa edukitzea, batetik, aberastasunaren banaketa bidezkoagoa izateko, eta, bestetik, soldata-arrakala zein pobreziari aurre egiteko. Gainera, adierazi dute neurriak eragina izango zukeela, batik bat, lan hitzarmenik ez dutenengan eta Espainiako Estatuko lan hitzarmena dutenengan, alegia, “bereziki, emakumeengan, immigranteengan, dibertsitate funtzionala dutenengan eta gazteengan”.
Nafarroako gutxieneko soldata propioa, ezerezean
Nafarroan gutxieneko soldata propioa adosteko bilerara egitekoa zuten otsailaren amaieran, CEN patronalarekin, baina ez ziren bertaratu ez patronala, ez UGT eta CCOO sindikatuak. ELAk eta LABek "ulergaitzat" jo zuten sindikatuek negoziazioari uko egitea. Gainera, martxoaren 5ean Nafarroako Parlamentuko Mahaiak atzera bota zuen gutxieneko soldata propioari buruzko herri ekimen legegilea, eskumen hori Nafarroaren esku ez zegoela adierazita.