HIP 2025 (Horeca Professional Expo) ostalaritzaren sektoreko berrikuntzen erakusleihoa izango da, martxoaren 10etik 12ra bitartean, IFEMAn (Madril). Ekitaldian parte hartuko dute 50.000 profesionalek, eta 700 erakusketari bilduko dira. Helburu nagusia sektorearen lehiakortasuna sustatzea da, azken urteko berrikuntzak eta teknologiak aurkeztuta.
Bertan izango da Basque Culinary Centerrek antolatutako Future Gastronomy Startup Foruma ere, martxoaren 11n. Lehiaketa horrek nabarmendu nahi ditu “ideia disruptiboak eta eraldatzaileak” dituzten enpresa berriak, zeinak ostalaritzaren etorkizuna irudikatzen duten. Hautatutako proiektuak teknologia, adimen artifiziala, jasangarritasuna eta bezeroen esperientzien hobekuntza landu behar dute, besteak beste. Foroan parte hartu nahi duten proiektuek izena eman beharko dute otsailaren 14a baino lehen.
Start-up lehiaketaren irabazleek aukera izango dute nazioarteko ikusle baten aurrean beren proiektuak aurkezteko eta sektoreko “liderrak” direnekin konektatzeko. Iaz, Oreka Circular Economy start-upak irabazi zuen lehiaketa, hondakinak murrizteko eta ekonomia zirkularra sustatzeko irtenbide berritzaileak garatzeagatik.