Idoia Otaeguik hartuko du EHUko Uda Ikastaroak Fundazioko (UIK) zuzendari akademikoaren kargua. Azken sei urteetan, 2018az geroztik, Itziar Alkortak gidatu du erakundearen zuzendaritza. Gaur, Idoia Otaeguiren postu aldaketaz gain, UIKren errektore taldeko gainerako erreleboak ere iragarri dituzte.
Zuzendari akademiko berriak eskerrak eman dizkio, batetik, Itziar Alkortari, erreleboa egiteko trantsizioan eskainitako laguntzagatik, eta, bestetik, Joxerra Bengoetxea EHUko errektoreari, beregan jarritako konfiantzagatik. Aldi berean, zuzendari ohiak eskerrak eman dizkie zuzendaritza taldeko kideei, eta azpimarratu du sei urteak esperientzia “bikaina” izan direla. Hemendik aurrera irakasle eta ikertzaile lanetan jarraituko du Alkortak.
Otaegui Nazioarteko Zuzenbide Pribatuko irakasle agregatua da gaur egun EHUn, baina hori baino lehen zenbait lanetan aritu da: Justizia eta Lan Saileko sailburuordea, Jaurlaritzako Kabineteko zuzendaria, Nafarroako Parlamentuko aholkulari juridikoa eta abokatua ere izan da, besteak beste.