Izaskun Goñi Razquin (Iruñea, 1972) izango da Pasaiako Portu Agintaritzako presidente berria. Joakin Telleria ordezkatu du Goñik, zeinak portuko lehendakaria izan den 2020az geroztik. Erretiratu egingo da Telleria.
Pasaiako portuko lehen emakumezko presidentea izango da Goñi. Nafarroako Unibertsitate Publikoan Ekonomian lizentziatua da eta master bat egin zuen enpresa zuzenbidearen arloan, Paueko unibertsitatean, Frantzian.
Enpresa pribatuan hasi zuen bere ibilbidea, higiezinen sektorean. Gerora, grafikagintzan hainbat ardura postu ere izan zituen. Nafarroako Gobernuan aritu da azken urteotan, besteak beste, Nafarroako Gobernuko Garapen Ekonomikoaren Departamentuko zuzendari nagusi izan da zortzi urtez, eta Industria, Digitalizazio, Politika Ekonomiko, Nazioarteko Merkataritza, Europako Funts eta Lan arloez arduratu da. Iaz, halaber, SRT Automative konpainiako aholkulari izendatu zuten, eta NHOD Industries Frantziako berrikuntza ingeniaritzako presidente ez-exekutibo bezala ere aritu da.
Ivan Jimenezek ordezkatuko du Barkala
Bilboko portuari dagokionez, aste honetan jakin da Ricardo Barkalak presidente izateari utziko diola. Bada, Eusko Jaurlaritzak Ivan Jimenez proposatuko du presidente berri bezala. Bizkaia Talent foru agentziako zuzendari nagusia da Jimenez 2011az geroztik. 50 urte ditu, Zuzenbidean lizentziatua da Deustuko Unibertsitatean eta abokatu bezala egin zuen lan Mapfren hamar urtez.