Kulturaren eta sormenaren sektorean ekintzailetza bultzatzea helburu duen Sortu eta Ekin programaren bigarren deialdia ireki da. Sektoreko proiektuak garatzeko funtsezko baliabideak, prestakuntza eta laguntza emango eskainiko die egitasmoak parte-hartzaileei. Lehenengo deialdian sei proiektu interesgarrik hartu zuten parte, eta horietako batzuk gaur egun Errenteriako (Gipuzkoa) Agustinak Zentroan daude, beren proiektuak garatzen.
Gipuzkoako Foru Aldundiak finantzatutako ekimena da, Oarsoaldea Garapen Agentziaren laguntzarekin. Kultura edo sormen sektorean ideiak edota proiektuak garatzeko lehen etapetan dauden pertsonei, beren jardueran enpresa batean kontuan hartu beharreko ezagutzak eta ikuspegia ikasi nahi duten profesionalei eta sormen diziplinetan graduatutako pertsonak eta kulturaren eta sormenaren sektorean ekintzailetzan prestakuntza praktikoa eta esperientzia nahi duten ikasleei zuzenduta dago programa.
Prestakuntza “trinkoa eta presentziala” izango da, eta gehienez hamar parte-hartzaile izango dira. Funtsezko gaiei buruzko saio monografikoak, kultura eta sormen ekosistemari buruzko hitzaldi espezializatuak, sektoreko enpresei bisitak eta ekimen bakoitzari egokitutako ibilbide-orri baten hasierako azterketa eta garapena izango dute parte-hartzaileek.
Hautagaitzak aurkezteko epea apirilaren 25era arte egongo da zabalik, eta programa maiatzaren 5etik ekainaren 20ra bitartean egingo da.