Datorren ekainaren 2 eta 3an egingo du ELAk bere hamaseigarren Kongresu Federala. Mitxel Lakuntza beste lau urtez idazkari nagusi izateko hautagai bezala aurkeztuko da, eta ekaineko ekitaldian bozkatuko dute bere karguan berresten duten edo ez. Haren alboko hautagaitzari dagokionez ere ez da aldaketatik izango eta Amaia Muñoa aurkeztuko da.
Gaur, Bilbon aurkeztu du sindikatuak kongresua, zeina hiriko bereko Euskalduna jauregian egingo den, Langileria antolatu, gizartea eraldatu lelopean. Bertan elkartuko dira sindikatuko 736 ordezkari eta batzorde eragileak aurkeztutako txostena aztertuko dute.
Lakuntza eta Muñoaren jarraipenaz gain, batzorde eragilean sartzeko hiru izen proposatu dituzte. Ane Bilbao Alzelai zerbitzu juridikoetako arduradun izango da, Luis Fernandez Centerno sindikalizazio eta militantziarena eta Unai Oñederra prestakuntzaz, Iparraldeaz eta estrategia subiranistaz arduratuko da.
"Konfrontazio gaitasuna boterea da; mobilizazioak egiteko eta grebak bultzatzeko ahalmena. Patronalari eta gobernuari gustatzen ez zaien errealitatea dago, baina ezin da ezkutatu; greba gehiagok hitzarmen hobeak ekarri dituzte", adierazi du Lakuntzak gaurko prentsaurrekoan.
2019tik da Lakuntza ELAren idazkari nagusi, eta bere bigarren kongresua izango da kargu horretan. Eskainitako konfiantza eskertu du, eta lau urteotan egindako lana gogoratu nahi izan du.