Espainiako Gobernuak erkidegoei zorra barkatzeko erabakia hartu izanaren ondorioz, Hego Euskal Herrian kezka sortu da, hain zuzen, neurriak EAEn eta Nafarroan kalte eragina izan dezakeelako. María Jesus Montero Espainiako presidenteorde eta Ogasun ministroak, ordea, baietsi du zorraren barkamenak ez duela galerarik eragingo Hego Euskal Herrian. Hala adierazi dio presidenteordeak EH Bilduko bozeramaile den Mertxe Aizpuruari gaurko Espainiako Gobernuko kontrol saioan.
Ezarritako erabakiak erkidegoei zorraren zati bat kenduko die, zeinak Espainiako Estatutuaren gain geratuko diren. Hego Euskal Herrian, aldiz, ez da zorrik kenduko, EAEko Kontzertu Ekonomikoaren eta Nafarroako Hitzarmen Ekonomikoaren ondorioz biek ala biek finantza autonomia dutelako.
Aizpuruak adierazi du ez dagoela gainerako erkidegoek neurriarekin probetxua ateratzearen aurka, nahiz eta EAEk eta Nafarroak neurriaren ondorioz irabazirik ez izan. Aldiz, argi utzi du neurriak irabazirik eman ez izanagatik, garrantzitsua dela kalterik ez sortzea, ez EAEn, ez Nafarroan. Izan ere, hasiera batean erabakiak eragin zuzenik izan ez arren Hego Euskal Herrian, etorkizunean interes gisa gobernu foralek ekarpen handiagoa egitea eragin dezake. Monterok, ordea, esan du hori “inola ere ez” dela gertatuko.