Euskaraldia erakundeetan nola hedatu eta landu daitekeen azaldu dute gaur, Donostian, San Telmo museoan egindako prentsaurrekoan. Euskaraldiaren laugarren edizioa maiatzaren 15etik 25era egingo da, eta mota guztietako entitateek jada badute aurtengo edizioan izena emateko aukera.
“Jakitun gara oso garrantzitsua dela Euskaraldiak entitateetan duen eraginaz. Eta ez entitateetan bakarrik, bertako kide askorentzat ere entitatea da euskaraz hitz egiteko duten eremu bakarra”, adierazi du prentsaurrekoan Goiatz Urkijo koordinatzaileak.
Entitateez hitz egitean, askotariko eremuei egin nahi die erreferentzia Euskaraldiak, hala nola lantokiak, kirol edo kultur elkarteak, dendak edota tabernak. Hala, eremu horietako ordezkariek izango dute nolako ariketa egin nahi duten hautatzeko aukera, izan ere, aurtengo edizioan ekimenak sustatutako oinarrizko egitekoez gain, euskararen erabileran bestelako urratsak emateko aukera ere izango dute.
EnpresaBIDEAk dagoeneko eman du izena Euskaraldiaren edizio honetan. Gaurko prentsaurrekoan izena eman duten beste hiru entitatek parte hartu dute: Irsearaba gizarte ekimenerako kooperatibak, Luma Baiona euskarazko murgiltze ereduko haurtzaindegiak eta Osasuna kirol taldeak.
Idoia Martinez de Lahidalga eta Sergio Jimenez Irsearabako ordezkarien esanetan, Euskaraldiarekin lortu nahi dute “euskararen erabilera areagotzea bai langileen artean baita lan egiten dugun pertsonekin ere”. Halaber, gaineratu dute Euskaraldian hartutako jarrera epe luzera mantendu nahiko luketela, “lotsak alde batera utzi eta euskara aktibatzeko”.
Patxi Amulet Luma Baiona haurtzaindegiko kideak azaldu du “euskararen sustapena eta transmisioa Luma Baiona Haurtzaindegiaren proiektuaren bihotzean direlako” eman dutela izena. “Euskaraldiaren garaian euskaldunak ez diren familien inplikazioa indartzen saiatuko gara, dela etxean euskara gehiago erabiltzea bultzatzen, dela familiekin euskarazko elkartruke-momentuak sortzen”, azpimarratu du.
Osasuna taldeko ordezkari gisa Mikel Erbitik parte hartu du gaurko ekitaldian. "Guk beti esan izan dugu osasunak euskaraz zuela izena baina izana erdalduna izan duela urte askotan”, kontatu du. Euskaraldian izena emanda bi helburu dituztela ere azaldu du: barne mailan, ariguneak sortzea, euskaldunon artean talde lanak euskaraz egin ahal izatea eta klub barruan euskararen normalizazioa bultzatzea. Kanpo mailan, aldiz, “helburua da zaleek sentitzea, euskara haiena den bezala, Osasunarekin duten harremana euskaraz ere egin dezaketela”, esan du.
Izena eman nahi duen entitate orok Euskaraldiaren webgunean du beharrezko informazio osoa. Belarriprest eta ahobiziek izena emateko txanda, berriz, martxoaren 15etik aurrera izango da.