2025-2028 enplegu plana sinatu du gaur Nafarroako Gobernuak CEN patronalarekin eta UGT eta CCOO sindikatuekin. Akordioaren arabera, 552,7 milioi euro bideratuko dira datozen hiru urteetan 387 egitasmotara. Neurri guzti horiek bost alorretan sailka daitezke: ezbehar tasa eta lan-arriskuen prebentzioa; aukera berdintasuna; lehiakortasuna; lan harremanak eta enplegu kalitatea; eta, azkenik, enplegu politika aktiboak.
Besteak beste, ezbehar-kopurua %20 murriztu nahi da planari esker, autonomoek lehen pertsona bat kontratatzeko laguntza sortuko da, eta figura berria gehituko da enpresetan berdintasun planen negoziazioak errazteko helburuarekin. Aurreko lau urtetako planaren %94 burutu den arren, oraindik bete ez diren neurriak ere gehituko dira plan berrian.
Zifren arabera, esaterako, aurreko planeko laguntza ekonomikoak baliatu zituzten 5.579 enpresek, krisi egoerei aurre egiteko, eta prebentzioko lurralde-ordezkariaren figurak 240 enpresa bisitatu zituen.
Hitzarmena sinatu dute María Chivite gobernuko lehendakariak, Manuel Piquer CEN Nafarroako patronaleko idazkari nagusiak, Jesús Santos UGT sindikatuko idazkari nagusiak eta Alfredo Sanz Nafarroako CCOOko Ekintza Sindikaleko idazkariak.