ELAk eta LABek gaur goizean lanbidearteko gutxieneko soldata propioa ezartzeko bilera zuten egitekoa Nafarroako CEN patronalarekin, eta UGT eta CCOO sindikatuekin. Aitzitik, ez patronala ez eta UGT eta CCOO ere ez dira bertaratu. Bi sindikatuek salatu du betoa jarri dutela, eta modu honetara, Nafarroan lanbidearteko gutxieneko soldata sortzea oztopatu dutela.
Bigarren aldia da CEN, UGT eta CCOO gutxieneko soldata negoziatzeko mahaira azaltzen ez direla. Joan den otsailaren 13an egin zuten lehen bilerarako deialdia eta orduan ere LAB eta ELA sindikatuak soilik bertaratu ziren.
ELAk adierazi du “ulergaitza” dela UGTk eta CCOOk negoziazioei uko egitea, Euskal Autonomia Erkidegoko mahaiean negoziatzen ari direla kontuan hartuta. Zehazki, martxoaren 20rako dute deitua bost sindikatuek gutxieneko soldata negoziatzeko bilera Araban, Bizkaian eta Gipuzkoan.
“CENek langileak esplotatzeko aukerak erabat irekita jarraitzea nahi du, beren negozio eredua baldintza prekarioetan oinarritzen delako. Patronal moderno baten itxura izan nahi duen arren, praktikan CEN erakunde erabat atzerakoia da”, adierazi du ohar bidez ELAk. Halaber, sindikatuak instituzio eta alderdi politikoei eskatu die “babes dezatela Nafarroako egoera ekonomikoarekin bat datorren gutxieneko soldata bat ezartzeko ekimena”.
LABek, bestalde, nabarmendu du CEN patronala eta UGT eta CCOO sindikatuak ez daudela "egoerak eskatzen duen mailan", eta ez diotela "jaramonik egiten jendarteak eta Nafarroako langileek eskatzen dutenari".