Bizkaiko Foru Aldundiaren Ingurune Naturala eta Nekazaritza Sustatzeko sailak Nekazaritza Politika Bateratuaren (NPB) dirulaguntzak jasotzeko deialdia ireki du gaur. 14 milioi euroko laguntza izango da, eta lurraldeko nekazaritza nahiz abeltzaintza ekoizpena babestea dute helburu. Eskaerak egiteko epea apirilaren 30era arte egongo da zabalik.
Aldundiak azaldu duenez, lurraldeko 2.900 ustiategiko langileek izango dute eskaera egiteko aukera. Hala, eskaera prozesua erraztearren, Nekazaritza Zuzendaritzak jakinarazpen bat bidaliko die onuradunei, eskabidea aurkezteko esleitutako tokia, eguna eta ordua adierazita.
Bi laguntza mota jaso ditzakete baserritarrek. Lehenengo laguntza lerroak Nekazaritza Bermatzeko Europako Funtsak (NBEF) finantzatuta, 9 milioi euro baino gehiagoko aurrekontua du, eta nekazaritza eta abeltzaintza ekoizpenerako zuzeneko laguntzetara bideratuta dago, baita ingurumen eta klima konpromisoekin eta garapen iraunkorraren gaineko beste alderdi batzuekin lotutako neurrietara ere.
Bigarrena, Landa Garapenerako Europako Nekazaritza Funtsak (LGENF) finantzatuta, ia 4 milioi euro ditu; horietatik bi milioi euro muga natural eta zehatzak dituzten mendi-eremuetarako laguntzetara bideratuko dira, eta 1,8 milioi euro nekazaritza eta ingurumeneko laguntzetara.