Confebaskek eta hiru lurraldeetako patronalek berretsi dute ez dutela EAErako gutxieneko soldata propioa babestuko, “arriskuan” jartzen duelako euskal enpresen lehiakortasuna eta jasangarritasuna, eta, ondorioz, ez dira bertaratuko sindikatuek martxoaren 20an deitutako Lan Hitzarmen Kontseilura. Hain zuzen, atzo bertan adostu zuten sindikatuek 1.500 euro gordineko gutxieneko soldata propioa proposatzea bileran.
Prentsa oharrean zenbait datu gogorarazi dituzte: batetik, lanbide arteko gutxieneko soldata (SMI) %67 hazi dela (6.700 euro gordin urtean) 2018. urteaz geroztik, eta, bestetik, gizarte kotizazioak %23 handitu direla 2022tik. Bestalde, azaldu dute enpresetatik “jada egin dutela esfortzua” azken urteetan soldatak Espainiako Estatukoak baino gehiago handitzeko, Espainiako %14aren aldean %15eko soldata hazkundeak eginda, eta, hala, “langileen eta haien familien erosteko ahalmena handituta”. Azkenik, baieztatu dute jardunaldi laburrenak eta soldata altuenak izaten jarraituko duela EAEk.
Enpresarien ustetan Eusko Jaurlaritzak eta sindikatuek eskubidea dute Elkarrizketa Sozialerako Mahaia antolatzeko gutxieneko soldata propioari buruz hitz egiteko, “hori egitea egoki baderitzote”. Hala egitekotan, patronalek aprobetxatuko lukete absentismoari, lehiakortasunari eta lan-kostuei buruz eztabaidatzeko, alegia, “euskal enpresak bereziki kezkatzen dituzten gaiei buruz” aritzeko.
“Horregatik, gure ustez ezinezko da EAEko lan-baldintzak hobetzeko eztabaida hori egitea, baldin eta lehenik ez bada absentismoari eta enpresen ahalmen ekonomikoari buruzko eztabaida antolatzen”, gaineratu dute.